Чӑваш Республикинче 2025 ҫула Ҫӗнтерӳпе патриотлӑх ҫулталӑкӗ тесе пӗлтересси ҫинчен  Чӑваш Республикин Пуҫлӑхӗ Олег Николаев паян Указа алӑ пусса ҫирӗплетнӗ. 1941–1945 ҫулсенчи Тӑван ҫӗршывӑн Аслӑ вӑрҫинче Ҫӗнтерӳ тунӑранпа 80 ҫул ҫитнине палӑртса тата вӑрҫӑ ветеранӗсемпе тыл ӗҫченӗсен калама ҫук пысӑк паттӑрлӑхӗпе хастарлӑхне тата хӑйсене хӗрхенменлӗхне ӗмӗрлӗхе асра хӑварас тӗллевпе ҫапла палӑртма йышӑннӑ.

Чӑваш Республикин Министрсен Кабинечӗн Чӑваш Республикинче 2025 ҫулта Ҫӗнтерӳпе патриотлӑх ҫулталӑкне ирттерес енӗпе ӗҫлекен йӗркелӳ комитетне туса хума тата унӑн йышне ҫирӗплетме хушнӑ. Чӑваш Республикинче 2025 ҫулта Ҫӗнтерӳпе патриотлӑх ҫулталӑкне ирттермелли тӗп мероприятисен планне туса хатӗрлемелле тата ҫирӗплетмелле, унта истори астӑвӑмне сыхласа упрама тата ҫамрӑксене патриотла воспитани пама пулӑшакан ӗҫсене палӑртса хӑвармалла тенӗ тӗп документра. Вырӑнти хӑй тытӑмлӑх органӗсене, йӗркелӳ-право тата харпӑрлӑх формине пӑхмасӑр организацисене Ҫӗнтерӳпе патриотлӑх ҫулталӑкӗ шайӗнче ирттерекен мероприятисене хастарлӑн хутшӑнма  сӗннӗ ӗҫ хутӗнче. Массӑллӑ информаци хатӗрӗсене Ҫӗнтерӳпе патриотлӑх ҫулталӑкӗ шайӗнче ирттерекен  мӗнпур мероприятисене тӑтӑшах ҫутатса тӑма сӗннӗ.