Чӑваш Республикин Экономика министерстви ҫумӗнчи Экспертсен канашӗн ларӑвӗнче ҫӗнтерӳҫӗ проектсемпе тӗплӗн паллаштарӗҫ, ӳлӗмрен вӗсене пурнӑҫа кӗртсе пырасси пирки те сӳтсе явӗҫ.  Палӑртса хӑваратпӑр, ӑмӑртӑва Чӑваш Республикин Пуҫлӑхӗн Олег Николаевӑн пуҫарӑвне тӗпе хурса йӗркелесе яма тытӑннӑ.

 2024 ҫулта проект ӗҫӗсене хатӗрлессине ҫӗнӗлле туса пыма, паянхи пурнӑҫ таппине тӗпе хурса йӗркелеме йышӑннӑ.  Шупашкар агломерацийӗн мастер-планне шута илсе, конкурса хутшӑнакансене туристсен маршутне туса хатӗрлес ыйту ҫине тимлӗх уйӑрма чӗнсе каланӑ.  Тепӗр тесен, муниципаллӑ округсенчи кулльтурӑпа истори, ҫут-ҫанталӑк ырлӑхӗсене тарӑн тишкерсе, вӗсен хӑйне евӗрлӗхӗ пирки халӑх валли кӑсӑклӑ материалсем пухма, тарӑнрах тӗпчеме те сӗннӗ.  

 Чӑваш Республикин Пуҫлӑхӗ Олег Николаев ҫӗнтерӳҫӗсене саламланӑ май, ҫапларах палӑртса каланӑ: « Палӑртнӑ сӗнӳсем , ӑмӑртӑва хутшӑнакансемшӗн питех те пӗлтерӗшлӗ пулса тухнӑ.  Кӗске вӑхӑт хушшинчех, конкурса хутшӑнма кӑмӑл тунисем асӑннӑ темӑна тарӑн ҫутатса пама пултарнӑ.   Пысӑк профессионалсем те хапӑл тусах, проектсемпе паллашма кӑмӑл тунӑ.  Обществӑна аталантарас ӗҫе конкурса хутшӑннисенчен кашни пысӑк тӳпе хывнӑ.  Пирӗн республикӑна пысӑк тавра курӑмлӑ, пуян ӑс-хакӑллӑ, паха специалистсем – управленецсем кирлӗ.  Паянхи пурнӑҫ таппинче, кулленех кӗтмен ҫӗртен ҫӗнӗлӗхсемпе тӗл пулнӑ самантра, туххӑмрах кирек-епле ыйтӑва та кирлӗ пек шайра татса пама пӗлни аван. Шӑпах та, кун пек чухне пысӑк профессионалсен йышӑнӑвӗнчен, пурнӑҫ аталанӑвӗ епле пулса пырасси те самай килет», – тенӗ.

Конкурс пӗтӗмлетӗвӗ тӑрӑх, ҫӗнтерӳҫӗсене дипломсем тата сертификатсем парса хавхалантарнӑ. 

Аса илтеретпӗр, 2024 ҫулта «Управленецсен команди»  конкурса 71 заявка панӑ. Бизнесра, культурӑра, вӗренӳпе наукӑра пысӑк кӑтартусемпе палӑрнӑ профессионалсем хӑйсен проекчӗсемпе паллаштарма кӑмӑл тунӑ.  Ҫурма финала пӗтӗмпе 60 ҫын тухнӑ.  Палӑртса хӑваратпӑр,  конкурсӑн ҫӗнтерӳҫисене Чӑваш Республикин управленец кадӑрӗсен резервне тӑма май пулӗ. Экспертсен канашӗн членӗсемпе, Чӑваш Республикин влаҫ органӗсенче тӑрӑшакансемпе те тачӑ ҫыхӑнса ӗҫлеме ҫул-йӗрсем уҫӑласси куҫ кӗретех.  

Профессионалсен пуҫарӑвӗсене аталантармалли регионти ӑмӑрту управлени хӑнӑхӑвӗсене ҫамрӑк ҫынсем уҫма пултаракан креативлӑ управленецсен командине пухасси ыйту кун йӗркинче тӑрать.  Ҫамрӑк управленецсемпе предпринимательсемшӗн хаклӑ опыт. Креативлӑ управленецсен командинче çамрăксем хӑйсем валли усӑллӑ ҫыхӑну тупма тата хӑйсен пултарулӑхне пурнӑҫлама хӑнӑхусем йӗркелеме пулӑшать.

Конкурс йӗркелӳҫисем пулас управленецсем валли ҫемҫе хӑнӑхусемпе управлени пултарулӑхӗсене аталантармалли уйрӑм программа сӗнеҫҫӗ. Республикӑри  специалистсемшӗн ҫакӑ хӑйӗн вӑйлӑ енӗсене уҫса пӗр шухӑшлӑ ҫынсене амбициозлă профессионалсем хушшинче тупма питӗ лайӑх май.