Ял хуҫалӑхӗн тата тирпейлекен промышленноҫӗн  ӗҫченӗсен кунне халалланӑ савӑнӑҫлӑ пулӑмра Чӑваш Ен Пуҫлӑхӗ Олег Николаев тухӑҫлӑ ӗҫленӗшӗн тата чи лайӑх кӑтартусене пурнӑҫланӑшӑн республика ӑмӑртӑвӗн ҫӗнтерӳҫисене чысланӑ.  Кӑҫал чи лайӑххисем Красноармейски, Шупашкар тата Муркаш округӗсем пулнӑ.  Вӗсем территорисене тирпей-илем кӗртмешкӗн 150 пин тенкӗлӗх сертификатсене тивӗҫнӗ.

Кăçал ял хуçалăхĕшĕн ăнăçлă мар тесе те каласах килмест. Тыр-пул тухăçĕ аван. Ҫӗр ӗҫченӗсемшӗн пĕртте çăмăл пулман паллах. Паян республикăра ял хуçалăх ĕçченĕсен кунне уявланă май малашлăхри плансене те сӳтсе явнӑ,  ҫитӗнӳсем пирки тӗплӗнрех чарӑнса тӑнӑ.

Чӑваш Республикин Пуҫлӑхӗ Олег Николаев  мероприятине пухӑннисене саламланӑ май, ҫапларах палӑртса каланӑ: «Агропромышленность комплексӗ патшалӑхӑн чи кирлӗ ыйтӑвӗсенетатса парать. Сирӗн ӗҫӗре ҫӗршыври кашни ҫынах пысӑка хурса хаклать – эсир Раҫҫейӗн апат-ҫимӗҫ хӑрушсӑрлӑхне тивӗҫтеретӗр. Кашни наградӑра пысӑк коллектив ӗҫӗ. Сирӗн тӑрӑшулӑхӑра пула республикӑри тата ҫӗршыври тирпейлекен предприятисем хамӑр чӗр тавартан лайӑх пахалӑхлӑ тата конкурентлӑ продукци туса хатӗрлеҫҫӗ. Чӑваш Ен хӑй умне  пӗлтерӗшлӗ тӗллевсем лартать – пахалӑхлӑ чӗр таварсене тирпейлесси ҫине тимлӗх уйӑрать», – тенӗ.

АПК пайӗнче пысӑк хисепе тивӗҫнисене патшалӑх наградисемпе чысланӑ регион Пуҫлӑхӗ. Ял хуҫалӑхӗн тата тирпейлекен промышленноҫӑн хисеплӗ ӗҫченӗсене пӗтӗм чунтан ҫирӗп сывлӑх, профессире ҫитӗнӳсем, ҫемье ырлӑхне суннӑ.

Республика Правительстви ял хуҫалӑхне аталантарассине пулӑшса тата хавхалантарса пырать, производствӑна ӑнӑҫлӑн аталантарма кирлӗ майсем йӗркелет. Регионта «Фермерсен шкулӗ» ӗҫлет, тӗрлӗ професси конкурсӗсем иртеҫҫӗ, грантсемпе субсидисем уйӑраҫҫӗ. «Чӑваш Ен – хӑмла туса илекен центр» Компетенцисен центрне туса хунӑ, унӑн никӗсӗ ҫинче хӑмла лартса ӳстерес ӗҫре тӗрлӗ енлӗ тӗпчевсем тумалли малта пыракан лаборатори инфратытӑмӗ ӗҫлет, ҫавӑн пекех хӑмла лартса ӳстермелли, ӑна татмалли машинӑсен комплексне туса кӑларас ӗҫе йӗркелесе янӑ. Пӗр сӑмахпа каласан, ял хуҫалӑхӗ регионта хӑватлӑн вӑй илсе аталанса пырать.

Раҫҫей Федерацийӗн Президенчӗн Указӗпе килӗшӳллӗн «Раҫҫей Федерациийӗн ял хуҫалӑхӗн тава тивӗҫлӗ ӗҫченӗ» хисеплӗ ята «Вурнарец» ООО директорне Александр Макулина тата  СХПК «Мураты» ООО генеральнӑй директорне Геннадий Спиридонова  панӑ.

Чӑваш Ен Пуҫлӑхӗн Указӗпе килӗшӳллӗн,  «Чӑваш Республики умӗнчи тава тивӗҫлӗ ӗҫсемшӗн» орденсемпе Чӑваш Республикин Министрсен Кабинечӗн Председателӗн ҫумне – Чӑваш Республикин ял хуҫалӑх министрне Сергей Артамонова тата «Ядринмолоко» ОАО президентне Николай Малова, «Батыревский» ЗАО директорне Петр Ялукова парса хавхалантарнӑ.

Яваплӑха туйса, тухӑҫлӑ ӗҫленисене  паллӑ пулӑмра чыс тунӑ, мала тухнисене, пысӑк хисепе тивӗҫнисене ыттисемшӗн чӑн-чӑн тӗслӗх тесе палӑртса хӑварнӑ ведомство ӗҫченӗсем.

Ҫӗр ӗҫченӗсем нихçанхинчен те ытларах тӗштырӑ туса илессишӗн  ырми-канми тӑрӑшнӑ, ҫитӗнӳре – ҫӗр ӗҫченӗсен ырми-канми ӗҫӗ, республикӑри ял хуҫалӑх Министерствин, инвесторсен пӗрлехи пысӑк ӗҫӗ тесе палӑртса каланӑ ертӳҫӗсем мероприятинче.