Пӗтӗмпе 43 эрне хушшинче 4574  ҫын чирленӗ тӗсе шута илнӗ. ОРВИпе чирленисенчен 61% ытла – ачасем.  Грипп тӗслӗхӗсене хальлӗхе тупса палӑртман.  

Кун пирки Министрсен Кабинечӗн Председателӗн ҫумӗ – республикӑн сывлӑх сыхлав министрӗ Владимир Степанов Чӑваш Ен Пуҫлӑхӗ Олег Николаев эрнесерен ирттерекен планеркӑра  хыпарланӑ.

 «Медицина организацийӗсенче грипп, ОРВИ тата COVID-19 чир-чӗртен упранас тесе, профилактика ӗҫӗсене вӑйлатнӑ.  Маскӑ тӑхӑнассине,  ҫӗнӗ коронавирус инфекцийӗсенчен сыхӑ тӑрассине ҫивӗчлетнӗ», – тесе каланӑ сывлӑх сыхлав министрӗ.

Вӑл каланӑ тӑрӑх, ҫак эрнерех кӑшӑл вирус инфекцийӗпе чирленӗ 76 тӗслӗхе шута илнӗ. Унчченхи эрнепе танлаштарсан чирлесси 21,7% чакнӑ.  Йывӑр аптраса нушаланакан пациентсем  ҫук.

 «Профилактика мероприятийӗсене ытларах ирттерни пӗлтерӗшлӗ. Анчах вара кӑлтӑксем сиксе тухсан, туххӑмрах кирлӗ пек комплекслӗ ӗҫсене йӗркелесе ирттермелле», – тесе чӗнсе каланӑ Чӑваш Ен Пуҫлӑхӗ Олег Николаев.

Чӑваш Ен Сывлӑх министерстви юпа уйӑхӗнче грипп тата коронавирус вирусӗсене  тӗрӗслеме май паракан хушма  90 пин экспресс-тест 41 медицина организацийӗ валли туяннӑ.

Владимир Степанов палӑртнӑ тӑрӑх, прививкӑсене вӑхӑтра туса ирттерни питӗ пӗлтерӗшлӗ. Грипа хирӗҫ вакцинациленӗ халӑхӑн тӳпи 40,4% танлашать, ҫӗнӗ коронавирус инфекцине хирӗҫ – 52,5%. Вакцина Спутник Лайт ҫителӗклӗ таран  региона илсе килнӗ.