Хаклӑ призывниксем, Чӑваш Республикин ҫыннисем!

Паян ҫӗршывӑмӑрта Призывник кунне паллӑ тӑватпӑр.

Раҫҫей Федерацийӗн Хӗҫ-пӑшаллӑ Вӑйӗсен ретӗнче хӗсмет иртесси – гражданла тивӗҫ кӑна мар, кашни ҫамрӑк ҫыншӑн пысӑк чыс та. Ҫар ретне тӑнӑ май эсир Тӑван ҫӗршывӑмӑра, унӑн интересӗсемпе хаклӑхӗсене шанчӑклӑн хӳтӗлекен пулма хӑнӑхатӑр. Эсир мӑн асаттемӗрсен паттӑрлӑхӗпе хӑйсене шеллеменлӗхӗ ҫинче никӗсленсе тӑракан Раҫҫейӗн мухтавлӑ ҫар йӑли-йӗркин еткерҫисем шутланатӑр. Паян пирӗн асаттесемпе аттесен ӗҫне ятарлӑ ҫар операцийӗ пыракан тӑрӑхри салтаксемпе офицерсем малалла тӑсаҫҫӗ. Ҫапӑҫу тӗллевӗсене кӑт­кӑс та йывӑр условисенче пурнӑҫласа вӗсем ҫирӗплӗх тата паттӑрлӑх кӑтартаҫҫӗ.

Ҫар хӗсмечӗ – чӑн-чӑн пурнӑҫ шкулӗ. Вӑл хӑвӑн вӑйна шанма, дисциплинӑна пӑхӑнма вӗрентет. Ҫарти кашни кун сирӗншӗн мӗн те пулин ҫӗннине ӑса хывма, малашнехи пурнӑҫра хӑвӑра кирлӗ пулма пултаракан хӑнӑхусене аталантарса пыма пулӑшакан май пулса тӑрӗ. Паллах, унта эсир шанчӑклӑ туссем тупӑр, ҫарти туслӑх – чи ҫирӗпписенчен пӗри вӗт. Эсир хӑвӑр умӑрти тӗллевсене пурне те чыслӑн пурнӑҫласса шанса тӑратӑп. Ҫирӗп сывлӑх, хастарлӑх тата службӑна ӑнӑҫлӑ ирттерме сунатӑп.

Чӑваш Республикин

         Пуҫлӑхӗ                                                                Олег Николаев