Чӑваш Ен Пуҫлӑхӗ Олег Николаев Шупашкар хулинче, Канаш, Хӗрлӗ Чутай, Вӑрмар тата Шупашкар муниципаллӑ округӗсенче пурӑнакансен ыйтӑвӗсене пӑхса тухнӑ.

Ятарлӑ ҫар операцине хутшӑннӑ паттӑр, Чӑваш Ен Пуҫлӑхне ҫар служащийӗсемпе доброволецсене, вӗсен ҫемйисене пулӑшнӑшӑн тав тунӑ. 

 «Пулать тепре чухне, предприятире ӗҫлекенсене тепӗр професси илме вӗренме яма ыйтни те. Ку паллах, питӗ тӗрӗс ҫул-йӗр. Кун пек тусан, паянхи пурнӑҫ ыйтакан ыйтусене татса пама та меллӗ. Пысӑк профессионалсем пулни питӗ паха.  Тепӗр тесен, эпир республикӑра СВО хутшӑнакансем патне пысӑк тимлӗх уйӑратпӑр. Вӗсен кӑмӑлне шута илсе, лайӑхрах аталанса вӑй илсе пыма хӑтлӑ условисем туса паратпӑр. Аманнӑ паттӑрсен сывлӑхне упраса хӑварассишӗн, вӗсене кирлӗ пек пысӑк медицина пулӑшӑвӗсемпе тивӗҫтерни те куҫ кӗретех», –  тесе каланӑ хӑйӗн сӑмахӗнче Чӑваш Ен  Пҫлӑхӗ Олег Николаев.   Тепӗр чи ҫивӗсч ыйтусенчен пӗри – паттӑрсене ятарлӑ ҫар операцийӗсенчен каялла тӑван яла килсен, ӗҫпе тивӗҫтересси. Ку ыйтӑва та пысӑк тимлӗх уйӑрма чӗнсе каланӑ регион Пуҫлӑхӗ Чӑваш Республикин Ӗҫлев министерствине.

Шупашкарта  Р. Зорг урамра 21/1–мӗш номерлӗ ҫурт ҫывӑхӗнче электричество ҫути пулманни вырӑнти халӑха пӑшӑрхантарнӑ.  Кун пирки те Чӑваш Ен Пуҫлӑхне пӗлтернӗ унта пурӑнакансем.  Ыйту 2025 ҫулта уҫӑмланассине асӑннӑ Ертӳҫӗ.  

Хӗрлӗ Чутайӗнче ФАПра ӗҫлекен фельдшер Галина Михопарова ҫурт юрӑхсӑра тухнине хыпарланӑ.  Республика Пуҫлӑхӗ ҫӗнӗ объекта тума 2026 ҫул валли плана кӗртсе хӑварнине асӑннӑ.  Сывлӑх сыхлавӗн учрежденийӗсене тапхӑр-тапхӑррӑн юсаса ҫӗнетсе пынине асӑннӑ, май пур таран планпа килӗшӳллӗн ҫӗннисене те хута ярса пынине пӗлтернӗ.   

Шупашкар муниципаллӑ округра пурӑнакан Люба Иванова кӗҫӗн класри ачасене вӗрентет.  Шкул ҫывӑхӗнче ачасене утса ҫӳреме тротуар ҫукки пирки пӗлтернӗ республика Пуҫлӑхне.  Ҫулталӑк вӗҫленнӗ тӗле проектпа смета хатӗрлеесе ҫитерессине, ҫывӑхри автоҫула юсаса ҫӗнетме тӗллев лартнине те каланӑ Пуҫлӑх. Ун чухне ҫурран утакансене валли тротуар туса хӑварма йышӑннине те хыпарланӑ.  Шкул ҫывӑхӗнче автомашинӑсне вырнаҫтрма ятарлӑ тӳрем пулассине те асӑннӑ вӑл сӑмаха малалла тӑснӑ май.

Вӑрмар тӑрӑхӗнче пурӑнакан Владимир Ванюкова шыв ыйтӑвӗ канӑҫ паман.  Шыв башнине юсама, ҫӗр айӗнчен шыва кӑлармалли насоса ҫӗннипе улӑштарма плана кӗртнине пӗлтернӗ республика Пуҫлӑхӗ.

Хӗрлӗ Чутайӗнче пурӑнакан пенсионер Ольга Сергеевӑна  та шыв ыйтӑвӗ пӑшӑрхантарнӑ. Шыв ҫуккипе тепре чухне аптранине пӗлтернӗ вӑл.  Регион Пуҫлӑхӗ вырӑнти администраци 2025-2027 ҫулсем валли адреслӑ инвестициллӗ программӑпа килӗшулӗн объекта тума плана кӗртнине пӗлтернӗ.

Светлана Васильева Канаш муниципаллӑ округӗнчи Шаккӑл шкулӗнче ӗҫлекен Утта юханшывӗ урлӑ кӗпер хывма ыйтнӑ. Ӗлӗкхи 40 метрлӑ кӗпере ҫурхи шыв юхӑмӗ аркатнӑ, вырӑнта вӑхӑтлӑха йывӑҫ  кӗпер тунӑ. Анчах та ун урлӑ йывӑр тиенӗ машинӑсем каҫса ҫӳреймеҫҫӗ,  пушартан сыхланмалли техника иртсе ҫӳреймест. Олег Николаев 2025 ҫулхи ҫуллаччен проектпа смета документацийӗсене хатӗрлессине тивӗҫтерме хушнӑ ятарлӑ ведомство ӗҫченӗсене .