Кун пирки Чӑваш Ен Пуҫлӑхӗ Олег Николаев  республикӑра иртнӗ истори учителӗсен  федерацин Атӑлҫи тӑрӑхӗнчи форумӗн пӗрремӗш ӗҫне уҫнӑ май  палӑртнӑ.  

Шупашкара 14 регионтан 600 представитель килсе ҫитнӗ.  Шкулсенче историпе обществознани учителӗсем, вузсемпе техникумсен тата колледжсен преподавателӗсем, ҫарпа патриотизм, шырав организацийӗсемпе пӗрлешӗвӗсен ертӳҫисем, вӗрентӳ организацийӗсене воспитани парас енӗпе ӗҫлекен канашҫӑсем  мероприятине пухӑннӑ.

 «Пирӗн истори чӑнлӑхне хамӑрӑн та уҫҫӑн пӗлмелле, ӑнланмалла. Ӑна тӗпе хурса ӗҫсене йӗркелесе пыма тӑрӑшмалла.  Ҫавна май Чӑваш Республики ҫарпа патриотлӑх ҫул-йӗрне хастар аталантарать. Шырав юхӑмӗсен ӗҫ-хӗлӗ те вӑй илсе аталанса пырать. Ҫамрӑксем, шкул ачисемпе студентсем, ҫулсерен «Вахта астӑвӑмӗ» шайӗнче 100 ытла ҫынсен кӗлеткисене шыраса тупаҫҫӗ, вӗсене асӑнса  палӑксем лартса хӑвараҫҫӗ. Истори чӑнлӑхне упраса хӑварас ӗҫе паянхи форум та питӗ пысӑк  витӗм кӳрет», – тесе палӑртса каланӑ  мероприятине пухӑннисене тав тунӑ май, Чӑваш Республикин Пуҫлӑхӗ Олег Николаев.

Форумӑн тӗп  тӗллевӗ – ҫитес ӑрӑва чӑнлӑх пирки тӗплӗн вӗрентсе хӑварасси, вӗрентекенсен ӑс-хакӑл тӗнчине пуянлатса, вӗсене ҫитӗнекен яш-кӗрӗмпе тачӑ ҫыхӑнса истори пулӑмӗсем пирки тарӑнрах тӗпчесе пыма вӗренсе пырасси.  Усал хыпарсенчен кулленех сыхӑ пулма вӗрентесси. Кун пирки те тӗплӗн чарӑнса тӑнӑ мероприятине пухӑннӑ ӗҫчешсем.    

«Форумри ӗҫ кӑтартӑвӗсене эпир тӗпе хурса хамӑрӑн Правительствӑн ӗҫ планне йӗркелесе пыма тӑрӑшӑпӑр тата хамӑрӑн пӗрлехи малашнехи ӗҫӗн ҫӗнӗ ҫул-йӗрӗсене йӗркелесе пырӑпӑр», – тесе пӗтӗмлетсе каланӑ хӑйӗн  сӑмахӗнче Чӑваш Республикин Пуҫлӑхӗ Олег Николаев.