Ҫемье ҫулталӑкне пӗтӗмлетессипе ирттернӗ савӑнӑҫлӑ мероприятине Чӑваш Ен Пуҫлӑхӗ хутшӑннӑ
«Раҫҫей Федерацийӗн Президенчӗ Ҫемье ҫулталӑкӗ тесе пӗлтернӗ 2024 ҫулта эпир унчченхи ҫулсене тӗпрен тишкерсе, иртсе пыркан ҫулталӑкра тата та ытларах кӑсӑклӑ мероприятисем ирттерсе пыма тӑрӑшрӑмӑр. Чи малтанах, ҫемьесемпе хутшӑнӑва тӗпе хурса, вӗсене хумхантаракан ыйтусене тарӑн тишкерӳ тунӑ. Пулӑшу формисене анлӑлатса пыма та условисем йӗркелесе пынӑ», – тесе уйрӑммӑн палӑртса каланӑ мероприятине пухӑннӑ ентешсене саламланӑ май Чӑваш Ен Пуҫлӑхӗ Олег Николаев. Чӑваш патшалӑх филармонийӗнче Ҫемье ҫулталӑкне пӗтӗмлетнӗ, унта республикӑри чи лайӑх ҫемьесем пуҫтарӑннӑ. Республика Пуҫлӑхӗ Олег Николаев ҫемьесем ҫӗршыва пулӑшас тӗллевпе нумай ӗҫ тунине палӑртнӑ.
Кӑҫал татса панӑ пӗлтерӗшлӗ ыйтусенчен пӗри – «нумай ачаллӑ ҫемьесем» ӑнлавӑн уҫӑмлӑ критерийӗсем туса хуни, удостоверенин пӗрлӗхлӗ формине йышӑнни. Ҫакӑ ҫӗршывӑн кирек хӑш регионӗнче те патшалӑх пулӑшӑвне илме пулӑшать. Юпа уйӑхӗн 1-мӗшӗнчен нумай ачаллӑ ҫемье статусне палӑртакан удостоверенине Патшалӑх пулӑшӑвӗсен порталӗ урлӑ харпӑр хӑй кабинечӗнче илме май пулнӑ. Нумай ачаллӑ ҫемьесен пӗрлехи реестрне йӗркелес ӗҫе вӗҫленӗ, ҫакӑ мониторинга тата социаллӑ пулӑшу мерисене парассине ансатлатма витӗм кӳнӗ.
Нумай ачаллӑ сахал тупӑшлӑ ҫемьесене ҫурт-йӗрпе коммуналлӑ пулӑшу енӗпе ҫӑмӑллӑхсем парасси пирки йышӑну тунӑ. Чӑваш Енре ҫак пулӑшӑвӑн формипе 600-е яхӑн ҫемье усӑ курма ӗлкӗрнӗ. Нумай ачаллӑ сахал тупӑшлӑ ҫемьесенчи ачасене шкул спорт формипе тивӗҫтерме тытӑннӑ. Форма туянма пӗр ача валли 12 700 тенкӗ уйӑраҫҫӗ – ку ПФО-ри чи ҫӳллӗ кӑтарту. Ҫакӑн пек пулӑшу 4800 ытла ҫемьене 8 пин ытла ачана спорт формипе тивӗҫтерме пулӑшнӑ. Пулӑшӑвӑн тухӑҫлӑ хатӗрӗсенчен пӗри – социаллӑ контракт – харпӑр хӑй ӗҫне йӗркелеме укҫа-тенкӗ тӳлевсӗр уйӑрни, ҫакӑ ҫемьене каярахпа хӑйне йӗркеллӗ пурнӑҫпа тивӗҫтерме май парать. Ҫак пулӑшупа 3 пине яхӑн ҫемье усӑ курнӑ.
Тӗллевлӗ патшалӑх политикине пула юлашки ҫулсенче нумай ачаллӑ ҫемьесен шучӗ палӑрмаллах ӳснӗ – Чӑваш Енре 19 пине яхӑн. Савӑнӑҫлӑ мероприятие ҫак обществӑн институтне ҫирӗплетес ӗҫе чылай тӳпе хывнӑ республикӑри ҫемьесем пухӑннӑ. Олег Николаев тивӗҫлӗ граждансем ӳстернӗ ҫемьесене патшалӑх наградисем парса хавхалантарнӑ.
Уявра нумай ачаллӑ ҫемьесене, чылай ҫул пӗрле пурӑнакан мӑшӑрсене медальсемпе наградӑланӑ. Ҫавӑн пекех мероприятире «Ҫулталӑк ҫемйи» конкурс ҫӗнтерӳҫисене чысланӑ. Чи лайӑх ҫемье ятне кӑҫал Ҫӗнӗ Шупашкарти Максимовсем тивӗҫнӗ.