Энергетика отраслӗн хисеплӗ ӗҫченӗсем тата ветеранӗсем!

Сире пӗтӗм чунтан професси уявӗпе – Энергетик кунӗ ячӗпе саламлатӑп!

Ҫак куна предприятисен, экономикӑн тӗп отраслӗсен кал-кал ӗҫне тивӗҫтерекенсем, миллионшар ҫын кил-ҫуртне ҫутӑпа ӑшӑ парса тӑракансем, паллӑ тӑваҫҫӗ.

2024 ҫулта Чӑваш Енре электричество сечӗсен хуҫалӑхне пӗрлештерес енӗпе пысӑк ӗҫ туса ирттертӗмӗр. Ҫавна май территорири тытӑм йӗркелекен сеть организацине палӑртрӑмӑр, вӑл ҫитес ҫултан пуҫласа электроэнергипе усӑ куракансем тата энерги сутакан организацисем валли «пӗр чӳрече» йӗркипе оператор ӗҫ-хӗлне пурнӑҫлама тытӑнӗ. Унӑн специалисчӗсем ҫавӑн пекех хуҫасӑр электросеть объекчӗсене ӗҫлеттерес тата ытти территорири сеть организацийӗсен сечӗсенчи пысӑк аварисене пӗтерес тӗлӗшпе вӑй хурӗҫ.

Республикӑра электричествӑпа зарядлакан станцисен инфратытӑмӗ хастарлӑн аталанать: хальхи вӑхӑтра ҫавнашкал 19 станци ӗҫлет, ҫулталӑк вӗҫленнӗ тӗле вара электричествӑпа зарядлакан тӗрлӗ хӑватлӑ 30 ытла станци хута кайӗ.

Палӑртнӑ ӗҫсен шутӗнче – электричествӑпа зарядлакан станцисем тӑвассине малалла тӑсасси, «Цифра энергорегионӗ» тата «Энергоцентрсен сетьне тӑвасси» проектсене аталантарасси, ҫакӑ пурте халӑха тата предприятисене энергипе тивӗҫтерсе тӑрассин пахалӑхне лайӑхлатма пулӑшӗ.

Чӑваш Ен паян хӑйӗн пысӑк технологисем тата инновацисем енӗпе тунӑ ҫитӗнӗвӗсемпе, ҫавӑн пекех энергетика хӑрушсӑрлӑхӗ пысӑк шайра пулнипе мӑнаҫланать. Пирӗн предприятисем Раҫҫейри пӗтӗм электротехника продукцийӗн 40 яхӑн процентне туса кӑлараҫҫӗ, хӑш-пӗр тавар енӗпе ку кӑтарту 60 процента та ҫитет. Чӑваш Енре туса кӑларнӑ приборсемпе пур ҫӗрте те усӑ кураҫҫӗ: кулленхи пурнӑҫра та, атом электростанцийӗсене ӗҫлеттернӗ чухне те. Ҫакӑ технологи суверенитетне тивӗҫтерме тата ют ҫӗршывсен программа тивӗҫтерӗвӗпе комплектламалли изделийӗсен витӗмӗнчен хӑтӑлма май парать.

Хаклӑ туссем! Сирӗн тӑрӑшуллӑ ӗҫӗре пула эпир пуласлӑха хальхи технологисене тата анӑҫлӑ йышӑнусене тӗпе хурса тӑватпӑр.

Сире ҫирӗп сывлӑх, ӗҫре ҫитӗнӳсем, професси енӗпе ҫӗнӗ ӳсӗмсем тума тата кашнинех телей сунатӑп! Кашни ҫӗнӗ кун сире хӑвӑр ӗҫӗр кӑтартӑвӗсемпе савӑнтартӑр тата киленӳ кӳтӗр.

Чӑваш Республикин Пуҫлӑхӗ                         Олег Николаев