Видеоҫыхӑну мелӗпе Раҫҫей Федерацийӗн Президенчӗ Владимир Путин Тӗнче аэропорчӗн Шупашкарти ҫӗнӗ пассажир терминалӗн ӗҫне старт панӑ.  Паллӑ пулӑма  Раҫҫей Федерациӗн транспорт Министрӗ Роман Старовойт тата Чӑваш Ен Пуҫлӑхӗ Олег Николаев хутшӑннӑ.

 «Хальхи пурнӑҫпа килӗшсе тӑракан терминала уҫни пӗтӗм республикӑшӑн пӗлтерӗшлӗ  пулӑм  пулса тӑчӗ. Илемлӗ те меллӗ аэропорт республикӑна килекен туристсемшӗн те лайӑх. Вӑл аэропортӑн расписание йӗркелеме тата ҫӗнӗ рейссене явӑҫтарма  витӗм кӳрӗ. 2025 ҫулта «Шупашкар-Калининград» ҫӗнӗ маршрутне уҫма палӑртнӑ. Малашнехи плансенче – пӗтӗм тӗнчери  ҫӗнӗ рейссене уҫасси те», – тесе  уйрӑммӑн палӑртса каланӑ Чӑваш Ен Пуҫлӑхӗ Олег Николаев.

Хальхи вӑхӑтри терминала уҫни республикӑшӑн питех те пӗлтерӗшлӗ. Туристсем те республикӑна хаклама вокзалсенчен пуҫлаҫҫӗ.

Уҫӑлнӑ ҫӗнӗ терминал — вӗҫсе каякан пассажирсем валли. Самолётпа республикӑна килекен пассажирсем валли те зала юсаса ҫӗнетӗҫ. Ку вӑл строительствӑн виҫҫӗмӗш тапхӑрӗ пулӗ. 2025 ҫулта перрона тата руль ҫулне юсама плана кӗрртнӗ.

Реконструкци вӑхӑтӗнче аэропорт инфраструктуринче чылай улшӑнусем пулса иртнӗ. Пӗтӗмӗшле лаптӑк 1500-тен 5000 тв. м таран пысӑкланнӑ. Сехетре 200 пассажир таран йышӑнма условисем пур.  Вокзалӑн пӗтӗм реконструкцийӗ виҫӗ тӗп тапхӑра пайланать. Вӗсенчен иккӗшне туллин вӗҫленӗ ӗнтӗ, ку ӗҫ калӑпӑшӗн 80-90% танлашать.

Ҫӗнӗ терминала ҫула тухакан пассажирсене шута илсе пурнӑҫа кӗртнӗ.

Шупашкарти аэропорт хитреленнӗҫемӗн хитреленсе пырать. Аэропорт патне пымалли тротуарсене  сарнӑ, таврара илемлӗх хуҫаланать. Аэровокзалта пассажирсене самолёт кӗтсе лармалли хӑтлӑ зонӑсем, кафе, касса тата япала упрамалли камерӑсем, багажа автомат мелпе йышӑнмалли тунӑ. Ачаллисем валли уйрӑм пӳлӗм пур. Каярахпа  ытти залсене  юсаса ҫӗнетесси те планра пур. 

Ҫуртӑн архитектура концепцийӗн никӗсӗнче Шупашкар хулин гербӗнчен вӗҫекен кӑвакал сӑнарне вырнаҫтарнӑ.  Ҫӗнӗ терминал интерьерӗсене детальсене уйрӑмах тимлӗн пурнӑҫланӑ, калӑпланнӑ объектӑн тӗп теми вара космос пулса тӑнӑ.

Аэровокзалта икӗ хутӗнче те пассажирсене йышӑнмалли  тата регистрацилемелли ҫӗнӗ зона вырнаҫнӑ.  Пӗр сӑмахпа каласан, паянхи пурнӑҫ таппипе тӳр килсе тӑракан условисем ҫителӗклӗ.  

Сывлӑх енчен хавшак пассажирсем валли пулӑшу кӳрекен ятарлӑ зонӑсем йӗркеленӗ, вӗсене мӗн пур кирлӗ пулӑшупа чӑрмавсӑр тивӗҫтереҫҫӗ. Пӗчӗк ачаллӑ ҫемьесем валли пурне те кирлӗ хатӗрсемпе тивӗҫтернӗ кӗтмелли пӳлӗмсем пӑхса хӑварнӑ.

Аэропорт палламалла мар улшӑнчӗ. Ҫурта тулаш тата шал енчен Андриян Николаев лётчик-космонавт сӑнӗ илем кӳрет.  Сӑмах май, аэропорт шӑпах ун ячӗпе хисепленсе тӑрать. Багаж илмелли лини  те хута янӑ. Иккӗмӗш хутри пӳлӗмсене те усаса ҫӗнетнӗ.  Юсава темиҫе тапхӑрпа ирттерме плана кӗртнӗ, ҫавӑнпа та аэропорт ӗҫне чармӗҫ. Шупашкартан самолётпа халӗ тӗрлӗ хулана ҫитме пулать. Аэровокзала ҫӗнетни  вӗсен шутне ӳстерме пулӑшать. Ҫывӑх вӑхӑтра сывлӑш карапӗ  ҫӗршывӑн тӗрлӗ хулисене ҫула тухӗ.

Реконструкцин пӗтӗм процесне «Аэрофьюэлз» компанисен ушкӑнне кӗрекен Пӗтӗм тӗнчери «Шупашкар Аэропорчӗ» ООО аэродром операторӗн – бюджет тулашӗнчи укҫа-тенкӗ шучӗпе пурнӑҫланӑ. Инвестицисен калӑпӑшӗ 1 млрд тенкӗрен иртнӗ.

 «Пирӗн партнер пӗтӗмпех туса ҫитерчӗ, пур  палӑртнӑ ӗҫе те туллин пурнӑҫланӑ. Владимир Владимирович, эпир сире чунтан тав тӑватпӑр. Эпир паян Росавиаципе пӗрле мӗнпур йышӑнӑва кӗске вӑхӑтра та проектлас енӗпе хастар ӗҫлетпӗр. Перрона тӗпрен юсама та палӑртнӑ.   Сире регион аталанӑвне яланах тимлӗх уйӑрнӑшӑн тав тӑватпӑр. Хамӑр енчен эпир мӗн килнине пӗтӗмпех туса пыма тӑрӑшатпӑр», – тенӗ хӑйӗн сӑмахӗнче Чӑваш Ен Пуҫлӑхӗ.

Аэродром комплексне ҫӗнетесси малалла тӑсӑлӗ. 2025 ҫулта перронпа рулеж ҫулне тӗпрен юсама тытӑнма палӑртнӑ.

«Хальхи вӑхӑтра А. Г. Николаев ячӗллӗ тӗнче аэропорчӗн перронне тата рулежнӑй ҫул-йӗрне тӗпрен юсама кирлӗ проект ӗҫӗсем пыраҫҫӗ. Умра пире ҫӗнетӳ пӗлтерӗшлӗ тапхӑрсем кӗтеҫҫӗ, вӗсем аэропорта хальхи требованисене тивӗҫтерме тата пассажирсене хӑтлӑ пӑхса тӑрассине  тимлӗхе илсе пыма май парӗҫ»,  – тесе палӑртса каланӑ Чӑваш Енри транспорт министрӗ Максим Петров.

 «Пирӗн аэропортӑн пуласлӑхӗ пур, регион потенциалӗ ҫав тери пысӑк, пассажир юхӑмӗ ҫулсерен ӳссе пырать. Халӗ пирӗн ҫӗнӗ терминал пур. Пассажирсене пысӑк хӑвӑртлӑхпа пӑхса тӑрӑпӑр. Ҫитес ҫулсенче эпир 700-800 пин пассажира ҫулталӑкра  тивӗҫтерме пултарайратпӑр»,  –  тесе сӑмаха ҫавӑрса каланӑ  «МАЧ» ООО генеральнӑй директорӗ Руслан Минаев.