Чăваш Республикин Пуçлăхĕ Олег Николаев Ҫӑлавҫӑ кунӗ ячӗпе саламлани
Ҫӑлав службин хисеплӗ ӗҫченӗсем!
Сире професси уявӗпе – Ҫӑлавҫӑ кунӗ ячӗпе саламлатӑп!
Ҫак уява паттӑр та хӑюллӑ тата хастар ҫынсем паллӑ тӑваҫҫӗ. Асӑннӑ пахалӑхсем сирӗнтен кашнийӗнех пур. Ыттисен хӑрушсӑрлӑхне тивӗҫтерессишӗн эсир кулленех тӗрлӗ хӑрушлӑхпа тӗл пулатӑр.
Хӑвӑра шеллеменнине тата чӑтӑмлӑх кӑтартса эсир ҫынсене чи кӑткӑс лару-тӑрура та пулӑшатӑр. Сирӗн ӗҫе пурнӑҫлама вӑй кӑна мар, ҫавӑн пекех васкавлӑ йышӑнусем тума пӗлни те кирлӗ, хӑш-пӗр чухне ҫын пурнӑҫне ҫӑлса хӑварасси шӑпах ҫавӑнтан килет.
Чӑваш Енре ҫӑлав службине техникӑпа пуянлатасси тата унпа ҫӗнӗрен тивӗҫтересси ҫине пысӑк тимлӗх уйӑратпӑр. Юлашки пилӗк ҫулта Хӗрлӗ Чутай, Элӗк, Красноармейски тата Пӑрачкав округӗсенче 4 пушар посчӗ йӗркеленӗ. Ҫакӑ пушар подразделенине халӑх пурӑнакан 57 вырӑнти йыхрава йышӑнса инкек пулнӑ вырӑна васкавлӑн пырса ҫитме май парать.
Шыравпа ҫӑлав служби валли – 28 техника хатӗрӗ, республикӑри пушар служби валли ку чухнехи 19 пушар машини туяннӑ.
Сире ӗҫре ҫитӗнӳсем сунатӑп, майсӑр лару-тӑру тӗслӗхӗ вара май килнӗ таран сахалтарах пултӑр. Пурсӑра та ҫирӗп сывлӑх, ырлӑх, ҫемьере телей сунатӑп.
Тӳрӗ кӑмӑлпа пурнӑҫлакан ӗҫӗршӗн пысӑк тав!
Чӑваш Республикин Пуçлӑхӗ О.А. Николаев