«Питĕ кĕске ĕç эрни пулин те — пĕлтерĕшлĕскер», — ĕç тăвакан влаç органĕсен тата муниципалитетсен ертӳçисемпе ытти чухне тунтикунсерен ирттерекен, хальхинче вара кĕçнерникун йĕркеленĕ канашлăва Чăваш Ен Пуçлăхĕ Олег Николаев çапла каласа пуçларĕ те — уявкану кунĕсене мĕнле ирттернине пĕтĕмлетрĕ: мĕн пур мероприяти тивĕçлĕ шайра пулнă. Çак ĕçе йĕркелеме хутшăннă службăсемпе ведомствăсене тав турĕ.

Театрта, йĕлтĕр йĕрĕ çинче

Мероприятисем çинчен вара министрсем каласа пачĕç. Культура министрĕ Светлана Каликова каланă тăрăх, раштавăн 20-мĕшĕнчен тытăнса кăрлачăн 8-мĕшĕччен республикăра Çĕнĕ çул, Раштав уявĕсене халалланă 1,6 пин ытла мероприяти иртнĕ, вĕсене 260 пин ытла çын хутшăннă. Театр-концерт учрежденийĕсем лайăх ĕçленине Светлана Анатольевна пайăррăн палăртрĕ. Çав шутра куракана темиçе премьерăпа савăнтарнă. Шупашкарти Трактор тăвакансен культура керменĕ кăна икĕ теçетке ытла Çĕнĕ çул представленийĕ йĕркеленĕ, 10 пин ытла ачана йышăннă. Уявсемпе çыхăннă мероприятисем вĕçленмен-ха — кăрлачăн 13-мĕшĕнче Раштав концерчĕ пулмалла. Вăрăм кану кунĕсемшĕн физкультурăпа спорт та кăтартуллă пулнă. Спорт министрĕ Василий Петров пĕлтернĕ тăрăх, 130 пăр аренăпа каток пĕр кун та пушă пулман. Шупашкарти Çĕнĕ хулари тăрăллă каток кăна çак кунсенче 4 пин ытла çынна йышăннă. Пĕтĕмпе вара республикăри ял-хулара 400 ытла спорт мероприятийĕ иртнĕ. Шупашкарта мини-футбол турнирĕ пулнă, Шупашкар округĕнче йĕлтĕрçĕсем ăмăртнă, Елчĕкре ачасемпе çамрăксен хоккей турнирне йĕркеленĕ. ГКЧС ертӳçи Сергей Павлов уяв кунĕсене хăрушсăрлăх енĕпе хакларĕ. Кăрлачăн 1-8-мĕшĕсенче гидрометеорологи служби енчен сакăр асăрхаттару пулнă та — çанталăк кутăнлăхне кура тивĕçлĕ службăсене çăмăл килменни куçкĕрет. Ăшă, шыв, газ парса тăрас енĕпе пăтăрмахсем пулман, электричество тĕлĕшпе вара чăрмавсем тухса тăнă. Раштавăн 30-31-мĕшĕсенче, кăрлачăн 1-мĕшĕнче чылай муниципалитет округĕнче çынсем вăхăтлăха çутăсăр юлнă. Çакна вăйлă çил, сывлăш температури тăруках улшăнни сăлтавланă пулин те Сергей Геннадьевич потребительсене киловатсемпе шанчăклăн тивĕçтерес ыйтăва оперативлă штаб ларăвĕнче пăхса тухма палăртнине çирĕплетрĕ. Пушар, вилнисем – сахалрах Çĕнĕ çул уявĕн кунĕсенче пиротехникăпа усă курасси йăлана кĕнĕ те — праçник умĕн çав хатĕрсене сутакан вырăнсене анлăн тĕрĕслессине йĕркеленĕ. Тĕрлĕ сăлтава пула 1,3 пин ытла пиротехника изделине туртса илнĕ. Çакă, паллах, унашкал хатĕрсемпе усă курнă май çын суранланнă тĕслĕхсем пулманнине кăна мар, пушарсен шучĕ чакнине те витĕм кӳнĕ. Пушарсем тенĕрен, раштавăн 31-мĕшĕнчен тытăнса республикăра 25 пушара регистрациленĕ. Пĕлтĕр çак тапхăрта кунашкал инкексем 43 пулнă. Кăçал Шупашкарта — 5, Çĕнĕ Шупашкарта — 4, Патăрьел, Шăмăршă, Куславкка тата Комсомольски округĕсенче икшер пушара шута илнĕ. Сăлтавĕсем — табак туртнă чухне асăрханманни, кăмакасем юсавсăрри. 7 тĕслĕхре мунчасем çуннă. Сергей Геннадьевич пысăк инкекпе вĕçленме пултарнă тĕслĕх çинче те чарăнса тăчĕ. Кăрлачăн 1-мĕшĕнче ирхине 5 сехет çурăра Вăрнар поселокĕнче полици патрулĕ пĕр хуçалăхри хуралтăсем çийĕн тĕтĕм мăкăрланнине асăрханă. Çулăм пурăнмалли çурт веранди çине куçасси те часах... Полицейскисем пушар çинчен пӳртри çынсене пĕлтерсе вĕсене пĕр тăхтамасăр çуртран илсе тухнă — çынсем вилме пултарнипе çыхăннă пысăк инкеке сирсе янă. Çавна май Сергей Геннадьевич та уяв-кану кунĕсем йĕркеллĕ иртнине палăртнă май хăйĕн сăмахне хăрушсăрлăха тивĕçтерме явăçтарнă тытăмсен ĕçченĕсене тав тунипе вĕçлерĕ. Олег Николаев кăрлачăн 1-мĕшĕнчен вилнисен ӳчĕсене морга, судмедэкспертизăна илсе килекен служба ĕçлесе кайнине аса илтерчĕ — унăн ĕçĕн пирвайхи кăтартăвĕсемпе кăсăкланчĕ: «Темех мар пек, анчах вилнисен тăванĕсемшĕн ку ĕç нумай чăрмав кăларса тăратать...» Вицепремьер — сывлăх сыхлавĕн министрĕ Владимир Степанов çак кунсенче асăннă служба ятарласа туяннă тата хатĕрленĕ автомобильсемпе вилнĕ 126 çын ӳтне илсе килнине пĕлтерчĕ, вăл йĕркеллĕ ĕçлесе кайнине çирĕплетрĕ.