Гражданла оборона тата чрезвычайлӑ лару-тӑру ӗҫӗсен  Патшалӑх комитечӗн Председателӗ Сергей Павлов  кашни эрнере пулакан планеркӑра республика Пуҫлӑхне Кӑшарни пирки пӗлтернӗ, унти  лару-тӑрупа тӗплӗн паллаштарнӑ, халӑх шыва кӗнӗ самантра нимӗнле усал кӑлтӑксем те пулса иртменнине хыпарланӑ.

Православи халӑхӗ Кӑшарни уявларӗ.

Купельсенче пӗтӗмпе 19 300 ытла ҫын шыва кӗнӗ, пурӗ вара уяв мероприятийӗсене 40 пин ытла ҫын хутшӑннӑ.

Чи малтанах  халӑха шыва кӗмелли вырӑнсем 118 палӑртнӑ пулнӑ, ҫав шутра: 22-шӗ  пӗвесенче, анчах та сывлӑш температури пысӑк пулнӑран шыв-шурсенче пӑр ҫирӗплӗхӗ чакнӑ, ҫавӑнпа шыва кӗме хутшӑнакансене хӑрушсӑрлӑхпа тивӗҫтерме чылай муниципалитетра юханшывсемпе пӗвесенче купельсем йӗркелеме чарасси пирки йышӑну тунӑ.

Шыва кӗрессине 107 ҫӗрте йӗркеленӗ, вӗсенчен 9-шӗ ҫеҫ  пӗвесенче пулнӑ.  Чылай округра сӑваплӑ ҫӑлкуҫсем таврашӗнче халӑха шыва кӗме ятарлӑ вырӑн хатӗрленӗ.   Кашнинех йӗрке хуралҫисемпе, ҫӑлавҫӑсемпе тата медицина ӗҫченӗсемпе тивӗҫтернӗ. Халӑх уйрӑмах йышлӑ пулакан вырӑнсенче ӑшӑ чатӑрсем вырнаҫтарнӑ. 300 ытла медицина ӗҫченӗ, ШӖМ, Росгварди, МЧС сотрудникӗсем, Чӑваш Республикин вырӑнти хӑй тытӑмлӑх органӗсен тата халӑх дружинникӗсен представителӗсем дежурство тӑнӑ.

Чӑваш Ен Пуҫлӑхӗ Олег Николаев  мероприятие тивӗҫлӗ шайра йӗркелесе ирттерме витӗм кӳнисене мухтаса тав сӑмахӗсем каланӑ: «Кӑшарни уявне  тивӗҫлӗ шайра йӗркелесе ирттересси йӑлана кӗнӗ, пӑтӑрмахсем сиксем тухман, йывӑр ҫухатусем пулман», – тесе палӑртса каланӑ вӑл.

Чиркӳсенче Иисус Христоса шыва кӗртнине халалласа кӗлӗсем иртнӗ. Турра ӗненекенсем ҫак кунсенче сӑвапланӑ таса шыва килӗсене илсе каяҫҫӗ. Чи хӑюллисем вара пуҫӗпех вакӑра чӳхеннӗ.