Муниципаллӑ йӗркеленӳсен интеграллӑ рейтингӗнче Вӑрнар муниципаллӑ округӗ 5-мӗш вырӑн йышӑнать. 

 «Социаллӑ пурнӑҫпа экономика аталанӑвӗн комплекслӑ программи вӑл – Правительство пайташӗсем, кашни муниципаллӑ округӑн управлени команди валли ӗҫ йӗркелемелли хатӗр. Халӗ пирӗн хушӑмӑрта мӗн пуррине, мӗнле потенциаллӑ майсем, резервсем пуррине  тарӑн тишкермелле. Малалла  вара Президент лартнӑ тӗллевсене шута илсе аталантармалли тӗллевлӗ ӗҫ планне йӗркелесси.  Бизнес ӗҫне тепӗр хут тарӑн тишкерме ыйтатӑп, вӗсен пуҫаруллӑ ӗҫӗсене витӗм кӳме тӑрӑшмалла.  Ҫӗнӗ ӗҫ вырӑнӗсем, пурнӑҫа ҫӗнӗлле йӗркелеме майсем туса пама тӑрӑшмалла.  Палӑртса хунӑ тӗллевсене пурне те пурнӑҫласан, бюджета хушма тупӑш пуҫтарӑнасси те куҫ кӗретех пулӗ», – тесе ҫирӗппӗн каланӑ хӑйӗн сӑмахӗнче Чӑваш Республикин Пуҫлӑхӗ Олег Николаев.

Олег Николаев утӑ уйӑхӗн 1-мӗшӗччен Чӑваш Республикин социаллӑ пурнӑҫпа экономика аталанӑвӗн 2025–2030-мӗш ҫулсенчи Комплекслӑ программи шайӗнче харпӑр хӑй территорине аталантарассипе стратегиллӗ план туса хатӗрлеме хушнӑ.  Ҫав шутра нарӑс уйӑхӗн 1-мӗшӗччен – вӑрман поселокӗсене халӑх пурӑнакан вырӑнсен ҫӗрӗсене (Вӑрнар округӗн генпланне) кӗртме сӗнӳсем хатӗрлеме  каланӑ.  Тасатмалли сооруженисен объектӗнчи шыв-шура тасатмалли кӑтартусене нормативлӑ пӗлтерӗшсем патне илсе ҫитермелле, шывпа халӑха тивӗҫтерес ыйту ҫине те тимлӗх уйӑрмалла,  социаллӑ пӗлтерӗшлӗ таварсен хакӗсен кашни эрнере иртекен мониторингне ирттерессине малалла тӑсмалла, «канмалли кун» ярмӑрккисене тивӗҫтермелле, тавар туса кӑларакансене регионти цифра платформи ҫинче «Чӑваш Ен БлагоДарит»  хӑйсен таварӗсем пирки хыпарсене вырнаҫтармаллине те чӗнсе каланӑ вӑл.  Чӑваш Республикин Строительство министерствине  И. Н. Никифоров ячӗллӗ Вӑрнарти 1-мӗш шкул ҫумне 400 вырӑнлӑх пристрой тӑвас ӗҫе йӗркелеме витӗм кӳме каланӑ.

Чӑваш Республикин социаллӑ пурнӑҫпа экономика аталанӑвӗн комплекслӑ программи шайӗнче 2030 ҫулччен Вӑрнар округӗнче 2,3 млрд тенкӗлӗх 13 инвестици проектне пурнӑҫа кӗртме палӑртнӑ.  Строительство енӗпе 148 инфраструктура проектне пӑхса хӑварнӑ.  Ҫул-йӗр, ЖКХ, социаллӑ сферӑпа ӗҫ рынокне, потребитель рынокне тата пулӑшу сферине пурнӑҫлама палӑртнӑ. Сывлӑх сыхлавӗ, вӗренӳ, спорт, культура, экологи тата пурнӑҫ хӑрушсӑрлӑхӗ енӗпе те сахал мар проектсем пур.  Вӗсене валли  3,7 млрд тенкӗлӗх тӑкакланасси те паллӑ.  «Хӑмла ӗрчетесси» 2 мегапроект пур.  Хастар вӑрӑм ӗмӗр центрӗсен сетьне уҫма пӑхса тухнӑ, «Манӑн социаллӑ центр» – ватӑ ҫынсемпе сусӑрсем валли инфраструктура хута яма плана кӗртнӗ.

Вӑрнар муниципаллӑ округӗн промышленноҫпа аграри экономики аталаннӑ (АПК 2023 ҫулта чи пысӑк предприятие – ӳсен-тӑрана хими хӳтӗлевӗн хатӗрӗсен заводне – шута илмесӗр 67% шутланать) малалла аталанма та хӑтлӑ условисем ҫителӗклӗ.  Вӑрнар округӗнчи хими промышленноҫӗн кӑтартӑвӗсем пысӑк. Ҫавӑн пекех ҫӳлерех палӑртнӑ округ ял хуҫалӑх таварӗсене туса илессипе те лайӑх ҫитӗнӳсемпе палӑрса тӑрать.  Ӳсен-тӑран ӗрчетес (хӑмла ӳстерес) тата апат-ҫимӗҫ промышленноҫӗнче  ҫӗнӗлӗхсене кӗртсе пыни – кӑтартусене тата та лайӑхлатма витӗм кӳрсе пыраҫҫӗ.  Кун пирки тепӗр хут ҫирӗплетсе каланӑ Чӑваш Республикин экономика министерствин ӗҫченӗсем.

Вӑрнар округӗн социаллӑ пурнӑҫпа экономика аталанӑвӗн пӗтӗмлетӗвӗсемпе Правительство кунӗ иртнӗ май 2020–2024 -мӗш ҫулхи кӑтартусемпе тата  2025–2030-мӗш ҫулсем валли палӑртнӑ тӗллевсемпе  вырӑнти  пуҫлӑх Надежда Никандрова тӗплӗн паллаштарнӑ.

Республикӑн тата муниципалитетӑн управлени команди умӗнче тӑракан тӗллевсем ҫинчен Чӑваш Республикин социаллӑ пурнӑҫпа экономика аталанӑвӗн 2025–2030-мӗш ҫулхи Комплекслӑ программине пурнӑҫа кӗртессипе Михаил Ноздряков, Сергей Артамонов, Максим Иванов, Владимир Степанов вице-премьерсем, промышленноҫпа энергетика министрӗ Сергей Лекарев, экономика аталанӑвӗн министрӗн ҫумӗ Ольга Рассанова, культура министрӗн  пӗрремӗш ҫумӗ Татьяна Казакова, цифра аталанӑвӗн министрӗн ҫумӗ  Екатерина Грабко тӗплӗн каласа кӑтартнӑ.

Республикӑри министерствӑсемпе ведомствӑсем пӗлтернӗ тӑрӑх, 2020 ҫултанпа Чӑваш Ен Пуҫлӑхӗ умӗнче ҫӗкленӗ ҫивӗч ыйтусенчен ытларахӑшне  татса пама май килнӗ.

Шкулсенчи чӳречесене ҫӗнетсе улӑштарнӑ.  Вӑрнарти Тӗп больницӑри пӳлӗмӗсене  тӗпрен ҫӗнетсе улӑштарнӑ.  Пӗтӗмӗшле практика врачӗн уйрӑмӗсене хута янӑ. 20 хваттерлӗ пурӑнмалли ҫурт урамне тӑвассине улӑштарас ыйтусене татса панӑ.  Ӳсен-тӑрана хӳтӗлемелли хими хатӗрӗсен производствине модернизацилеме витӗм кӳнӗ. Кӑкшӑм, Малдыкас, Туҫи Ҫармӑс, Шӗнерпуҫ тӑрӑхӗнче тата ытти ял тӑрӑхӗсенче  ҫӗнӗ ФАПсем хута янӑ.

Вӑрнарти котельнӑйпа ӑшӑ сечӗсене юсаса ҫӗнетессине, шывпа тивӗҫтермелли тытӑмсене юсассине, блокпа модульлӗ котельнӑй тӑвассине, гидротехника сооруженийӗсене тӗпрен ҫӗнетсе улӑштарассине  2025 ҫул  валли пӑхса хӑварнӑ.

Авариллӗ ҫурт-йӗр фондӗнчен (Вӑрнарти нумай хваттерлӗ ҫуртпа Нурӑсри нумай хваттерлӗ  пӗр ҫуртран) граждансене куҫарас ыйту ҫивӗч тӑрать. Чӑваш Ен Строительство министерстви тивӗҫлӗ программа хатӗрлет.

«Шывпа, ӑшӑпа, электричествӑпа, шкулпа сиплев учрежденисемпе ҫыхӑннӑ чылай ыйтӑва республика шайӗнче татса пама йышӑну тунӑ.  Вӗсене татса пама республика хыснинчен укҫа тӑкаклама та пӑхса хӑварнӑ.  Объектсене пурне те паянхи пурнӑҫ таппипе тӳр килтерсе хута яратпӑр.   Кун пирки халӑх та пӗрре мар ҫирӗплетсе калать. 28 пин ҫын пурӑнакан муниципаллӑ пӗрлешӳре тата епле ӗҫсем тӑвасси пирки шутласа пӑхар.  Инфратытӑм ҫирӗп аталаннӑ округра, промыленноҫ кулленех вӑй илсе пыни те никамшӑн та вӑрттӑнлӑх мар. Ял хуҫалӑх пайӗ те кирлӗ пек шайра аталанса пырать.  Пурнӑҫ лайӑх пултӑр тесен, пирӗнтен кашнин хамӑра шанса панӑ ӗҫсене яваплӑха туйса, тӳрӗ кӑмӑлпа пурнӑҫласа пыма тӑрӑшмалла. Кун пек пулсан, ҫитӗнӳ те часах пулӗ», – тесе ҫирӗппӗн каланӑ сӑмаха ҫавӑрнӑ май Чӑваш Республикин Пуҫлӑхӗ Олег Николаев.