СВО ветернӗсемпе унта хутшӑнакансене валли хатӗрленекен регион программи пирки Чӑваш Республикин Пуҫлӑхне Олег Николаева хыпарланӑ.

Патшалӑх тата муниципалитет служащийӗсем валли компетенцисене аталантармалли центр йӗркелеме палӑртнӑ, унта тавра-курӑмлӑха анлӑлатма май паракан условисем хатӗрлесси те паллӑ. Регион центрне вӗренӳ бази тесе йышӑнӗҫ.

2024 ҫулта Раҫҫей Федерацийӗн Президенчӗн Владимир Путинӑн  хушӑвӗпе килӗшӳллӗн,  СВО хутшӑнакансене валли «Время героев» управленец кадрӗсене хатӗрлеме ятарлӑ программа пуҫарса янӑ.  Ҫакӑн евӗр программӑна кӑҫал  Чӑваш Енре те йышӑнса хӑварма чӗнсе каланӑ регион Пуҫлӑхӗ Олег Николаев.   

«Калас пулсан, ку тӗлӗшпе эпир тахҫанах тӗллевсене пурнӑҫа кӗртсе пыма тытӑннӑ.  РФ Президенчӗн хушӑвӗ пирӗн ӗҫ хӑвӑртлӑхне ӳстерме витӗм кӳрет.  Ятарлӑ ҫар операцине хутшӑнакансем республикӑн пурнӑҫне хутшӑнма кӑмӑл туни куҫ кӗретех.  Ӗҫлев министерстви кирлӗ пек мӗнпур профессисене палӑртса хунӑ.  СВОран килекен яшсемпе паттӑрсене валли хушма пӗлӳ паракан центрсенче тавра-курӑмлӑха пуянлатса, паянхи пурнӑҫ таппипе тӳр килсе тӑракан профессисене алла илме хӑтлӑ условисем йӗркелесе тӑратнӑ.  Паттӑрсем тӗрлӗ сферӑсенче ӗҫлеме кӑмӑл туни те никамшӑн та вӑрттӑнлӑх мар. Вӗрентӳ пайӗнче те вӗсен йышӗ сахал мар.  Паллӑ, патшалӑх тата муниципалитет сферинче ӗҫлеме хӑйне евӗр специфика кирлӗ.  Ӑна шута илсе, шӑпах та асӑннӑ программӑна регионта пурнӑҫа кӗртме шутларӑмӑр», – тесе палӑртса каланӑ хӑйӗн сӑмахӗнче Чӑваш Рспубликин Пуҫлӑхӗ Олег Николав.   

Проекта хутшӑнас тесессӗн, анкета ҫырса тултармалла, тест тухмалла, тата ытти те.  Енчен те пӗтӗмпех йӗркеллӗ пулсан, 30-70  ҫынна курса йышӑнса, малалла вӗсен пӗлӳ шайне ӳстерсе пыма пулӑшӗҫ пысӑк профессионалсем.   

Конкурса СВО экс-хутшӑнакансем кӑна мар, ҫар служащийӗсем - ветерансем те хутшӑнайраҫҫӗ.  Курсран вӗренсе тухсан, паттӑрсене дипломсем парса тивӗҫтереҫҫӗ, резерва илсе, каярах кирлӗ пек ӗҫ вырӑнӗсм тупса параҫҫӗ. 2025 ҫул вӗҫленнӗ тӗле программӑна хутшӑнакансенчен ҫирӗм проценчӗ ӗҫе вырнаҫасси те куҫ кӗретех пулӗ. 2026  ҫул вӗҫленнӗ тӗле кӑтартӑва  80% кая мар ҫитерме тӗллев лартнӑ. Паттӑрсем ытларах ҫитӗнекен яш-кӗрӗме  тарӑн пӗлӳ пама пулӑшӗҫ, вӗсен ӑс-хакӑл тӗнчине пуянлатса пыма витӗм кӳрӗҫ.

Проектӑн йӗркелӳ ушкӑнне паха специалистсем, обществӑлла лидерсем, культура, наука пайӗнче пысӑк хисепе тивӗҫнисем кӗрӗҫ.  Пысӑк тавра курӑмлӑ управленецсемпе пӗрле кирлӗ пек йышӑнусем туса хӑварса, ҫитӗнекен яшсене тӗрӗс ҫул ҫине тӑма, ҫӗршыва парӑнса, уншӑн пысӑк кӑтартусемпе ӗҫлесе пыма вӗрентӗҫ.   Предприятисемпе организацисенче тӑрӑшакан ертӳҫӗсем, депутатсем, хӑйсен паха ӗҫ опычӗпе паллаштарса, ҫитӗнӳсем патне туртӑнма витӗм кӳрӗҫ.   

 Чӑваш Республикин  Пуҫлӑхӗ Олег Николаев Правительство пайташӗсем, ытти сферӑри ӗҫченсем программӑна хапӑл тусах хутшӑнма кӑмӑл тунине палӑртнӑ.  Ҫӗршывӑмӑрӑн, регионӑн социаллӑ пурнӑҫӗпе экономика аталанӑвне пӗр тикӗс лайӑх аталантарса пырас тесессӗн, пурин те яваплӑха туйса, хӑйсене шанса панӑ ӗҫсене тӳрӗ кӑмӑлпа пурнӑҫласа пымаллине чӗнсе каланӑ регион Пуҫлӑхӗ сӑмаха ҫавӑрнӑ май.