Хаклӑ студентсем!

Паян эпир Раҫҫей студенчӗсен кунне – ҫамрӑклӑхпа вӑй-хал тата пӗлӳлӗх уявне – ҫирӗммӗш хут паллӑ тӑватпӑр! Ӑна ҫӗршыври 270 ҫул каялла йӗркеленнӗ М.В. Ломоносов ячӗллӗ Мускаври чи ватӑ патшалӑх университечӗпе ҫыхӑннӑ историллӗ праҫнике асӑнса 2005 ҫулта Раҫҫей Президенчӗн Указӗпе туса хунӑ. 

Чӑваш Енри аслӑ шкулсенче, техникумсенче тата колледжсенче 70 пине яхӑн студент вӗренет, вӗсем темиҫе ҫултан хӑйсен профессийӗ-сенче малта пыракан технологисемпе идейӑсене аталантарса лидерсемпе новаторсем пулма пултараҫҫӗ.

Студент ҫулӗсем – чи асра юлакан тапхӑр. Студентлӑх вӑл – лекцисемпе экзаменсем кӑна мар, хӑв тӗллӗн пурӑнма вӗренни те, ҫӗннине уҫмаллин, ҫӗнӗ паллашусемпе ҫутӑ туйӑмсен ытарайми вӑхӑчӗ те. 

Эсир Чӑваш Енпе Раҫҫейри культура, спорт, наука пурнӑҫне хастар хутшӑнатӑр, Пӗтӗм Раҫҫейри тата пӗтӗм тӗнчери конкурссен, конференцисемпе фестивальсен ҫӗнтерӳҫисем пулса тӑратӑр, хӑвӑрӑн сайра йышши шухӑш-ӗмӗтӗре пурнӑҫлама грант выляса илетӗр, вӗреннипе пӗрлех общество пӗлтерӗшлӗ пуҫарусене пурнӑҫа кӗртетӗр. Волонтер юхӑмӗ тата студентсен отрячӗсен ӗҫӗ эсир хавхаланса хутшӑнмасан мӗнлерех шайра пулассине калама та пӗлмелле мар.

Сирӗн хастарлӑхпа ҫӗкленӳлӗхӗр пире те пурне те хавхалантарать! Сиртен кашниех – пӗлӳпе ҫӗнӗ ҫӗнтерӳсем патне ӑнтӑлакан пултаруллӑ ҫын. Хӑюллӑ пулӑр, хӑвӑра тата хӑвӑр таврари тӗнчене те лайӑхлатмалли майсене ан ҫухатӑр. Умӑра пысӑк тӗллевсем лартӑр, вӗсене пурнӑҫлӑр. Сирӗн умӑрта пур алӑк та уҫӑ, ӗмӗтӗрсене пурнӑҫа кӗртме тӑрӑшӑр. Эсир пулас профессионалсем кӑна мар, эсир – ҫӗршывӑмӑрпа республикӑмӑр пуласлӑхӗ!

Чӑваш Республикин Пуҫлӑхӗ                   О.Николаев