Республикӑри муниципаллӑ пӗрлешӳсем хушшинче Куславкка 14-мӗш вырӑн йышӑнать.    

 «Округ ӗҫ хӑвӑртлӑхне ӳстерсе пырать, малалла та хастаррӑн утӑмлать.  Ҫынсене пурӑнма кирлӗ мӗнпур хӑтлӑ условисемпе тивӗҫтерессишӗн ырми-канми тӑрӑшни те сисӗнет.  Юлашки ҫулсенче чылай ӗҫ туса ирттернӗ.  Республикӑн комплекслӑ программинче те округа аталантарма витӗм кӳрекен инвестициллӗ проектсем сахал мар.  Инфратытӑма аталантармалли проектсем пур.  Халӑха таса шывпа, ӑшӑпа тивӗҫтересси те кирлӗ пек шайра пулса пырать.  Кӑҫал причал тума округра плана кӗртнӗ.  Ку объект та чылай витӗм кӳресси куҫ кӗретех пулӗ. Шыв ҫийӗн ҫӳрекен транспортпа килме  кӑмӑл тӑвакансем йышланӗҫ. Вӗсене валли паянхи пурнӑҫпа тӳр килсе тӑракан чарӑну  вырӑнӗ хута ярассишӗн хастар тӑрӑшаҫҫӗ.  Пурӑнма юрӑхсӑра тухнӑ ҫуртсем те пӑрахӑҫланса пыраҫҫӗ, нумай хваттерлӗ ҫӗнӗ ҫуртсене хӑпартса лартассипе  тӑрӑшни сисӗнет.   Ҫитес икӗ ҫулта ыйтӑва туллин татса пама плана кӗртнӗ.  Пуласлӑхри тӗллевсем тата та пур. Вӗсене пурнӑҫа кӗртсе пырассишӗн мӗнпур ресурссемпе туллин усӑ курмалла.  Калӑпӑр, ял хуҫалӑх пайӗпе хастар ӗҫлемелле.  Енчен те палӑртса хунӑ пек мӗнпур ӗҫсем пурнӑҫлансан, шансах тӑратпӑр, эсир ҫитес пиллӗк ҫулта тата та лайӑхрах аталанса пыни никамшӑн та вӑрттӑнлӑх пулмассине. Енчен те Куславкка илемленсе пырсан, социаллӑ пурнӑҫпа экономика тата та вӑйлансан пирӗн тӑрӑха курма килес текен туристсен йышӗ те ӳссех пырӗ» – тесе ҫирӗппӗн каланӑ хӑйӗн сӑмахӗнче Чӑваш Республикин Пуҫлӑхӗ Олег Николаев.           

Чӑваш Республикин социаллӑ пурнӑҫӗпе экономикӑна аталантарма пӑхса хӑварнӑ Комплекслӑ программине тӗпе хурса, округ администрацин ертӳлӗхне утӑ уйӑхӗн пӗрремӗшӗ тӗлне вырӑнти территорине аталантармалли стратегиллӗ плана пӑхса хӑварма хушнӑ.  Куславккара тирпей-илем кӗртессипе ятарлӑ мероприятисене,  шыв ҫийӗн ҫӳрекен транспортсене валли килсе чарӑнмалли вырӑна хатӗрлеме, инфратытӑма юсаса ҫӗнетме, ял хуҫалӑх таварӗсен калӑпӑшне ӳстерме тата та хастартарах ӗҫлеме чӗнсе каланӑ регион Пуҫлӑхӗ.  2027 ҫул вӗҫлениччен асӑннӑ ӗҫсене туллин пурнӑҫа кӗртме хушнӑ.  Чӑваш Республикин Спорт министерствине проектсем валли кирлӗ пек документсене хатӗрлесе тӑратма каланӑ, спорт учрежденийӗсен пурлӑхпа техника базине ҫӗнетсе улӑштарас ыйту та кун йӗркинчех тӑнине палӑртнӑ.  Кулленхи пурнӑҫра усӑ курӑнакан таварсен хакӗсене те тӗрӗслевре тытмалла, мониторинг туса пымаллине палӑртнӑ ертӳҫӗсем.  «Чувашия БлагоДарит» цифра платформинче ял хуҫалӑх таварӗсем пирки хыпарсене вырнаҫтарса пымаллине тепӗр хут аса илтерсе хӑварнӑ.   

2030 ҫулччен пӑхса хӑварнӑ Комплекслӑ программӑра Куславкка муниципаллӑ округ валли инвестициллӗ 32 проект пӑхса хӑварнӑ.  Вӗсене пурнӑҫа кӗртме 2,1 млрд тенкӗ тӑкакланасси те куҫ кӗретех. 81 проект валли 6 млрд пӑхса хӑврнӑ, вӗсене  инфратытӑма ҫирӗплетме  парӗҫ.  Туризӑма аталантарас, строительствӑпа ЖКХа пайне вӑй илтересси, энергетика,транспорт, ҫул-йӗрпе сывлӑх сыхлавӗ, культура, вӗренӳпе социаллӑ сферӑри ыйтусем те кун йӗркинчех тӑраҫҫӗ.  Экологи, вак тата вӑтам предпринимательлӗх пайне аталантарса вӑй илтересси ыйтусем ҫине те тимлӗх уйӑрма чӗнсе каланӑ ларӑва пухӑннисем вырӑнти ертӳлӗхе.    

Правительство кунӗнче 2020 – 2024-мӗш ҫулсенчи социаллӑ пурнӑҫпа экономика аталанӑвӗн кӑтартӑвӗсемпе Куславкка муниципаллӑ округӗн пуҫлӑхӗ Алексей Людков тӗплӗн паллаштарӑ, ҫитес тапхӑр валли палӑртса хунӑ тӗллевсем пирки те каласа кӑтартнӑ.

2025 – 2030-мӗш ҫулсем валли пӑхса хӑварнӑ республикӑн Комплекслӑ программи пирки, субъектӑн социаллӑ пурнӑҫӗпе экономика аталанӑвӗн ҫитӗнӗвӗсемпе Чӑваш Республикин Министрсен Кабинечӗн Председателӗн пӗрремӗш ҫумӗ – финанс министрӗ Михаил Ноздряков,  Чӑваш Республикин Министрсен Кабинечӗн Председателӗн ҫумӗсем – Сергей Артамонов, Максим Иванов, Владимир Степанов,  промышленноҫпа энергетика министрӗ Сергей Лекарев, культура министрӗ Светлана Каликова, экономика министрӗн ҫумӗ Ольга Рассанова тӗплӗн каласа кӑтартнӑ.

 2020 ҫултанпа сахал мар ыйтӑва тӑратнӑ Куславккка муниципаллӑ тӑрӑхӗнче пурӑнакансем Чӑваш Республикин Пуҫлӑхӗ умӗнче. Палӑртмалла, вӗсенчен чылайӑшне туллин тивӗҫтернӗ тесен те йӑнӑш мар.  Ҫулсене сарнӑ, шкулсемпе ача сачӗсен ҫурчӗсене тӗпрен ҫӗнетсе улӑштарнӑ.  Инфратытӑма аталантарса вӑй илтерессипе курӑмлӑ ӗҫсем туса пыма витӗм кӳнӗ. Сăрпа Хусан хýтĕлев чиккисене тăвакансене халалласа Куславккара мемориал комплексĕ уçăлнӑ. Вăл Раççeйре те пěрре çeç. Сӑрпа Хусан хӳтӗлев чиккине тума пуҫланӑранпа 80 ҫул ҫитнине палӑртса,  паллӑ кун Куславкка тӑрӑхӗнчи асӑну комплексӗнче тылри паттӑрлӑха сӑнарлакан музей уҫнӑ.

Астӑвӑм кунӗ тӗлне мемориал ҫумӗнче ятарлӑ музей йӗркелесе ҫитернӗ, ӑна хута ямашкӑн «Культура» наци проекчӗпе килӗшӳллӗн федераци хыснинчен  чылай пулӑшу куҫарнӑ. Республика  та сахал мар тӗрев панӑ.  Курӑмлӑ пулӑшу музей ҫуртне интерактивлӑ хатӗрсемпе пуянлатма май панӑ.  Объект пурне те илӗртет. Стена тӑршшӗпех вырнаҫтарнӑ экрансем килен-каяна вӑрҫӑ вӑхӑтне тавӑраҫҫӗ. Шалта вара хӳтӗлев чикки тунисен паттӑрлӑхӗпе тӗплӗнрех паллашма пулать. Экспозицие Чӑваш наци музейӗнче упранакан экспонатсемпе тата окопсем пулнӑ вырӑнта шыравҫӑсем тупнӑ ӗҫ хатӗрӗсемпе илемлетнӗ. Апла пулсан, ҫӳлерех асӑннӑ округа республика Правительстви сахал мар пулӑшу панӑ, вырӑнти халӑх та ҫакна ҫирӗплетсех калать.