Чӑваш Ен Пуҫлӑхӗ Олег Николаев Правительство ҫуртӗнче эрнесерен ирттерекен планеркӑра нумай хваттерлӗ ҫуртсен картишсен территорийӗсене хӗллехи тапхӑрта тытса тӑрассине пӑхса тухнӑ.

 «Юлашки икӗ уйӑхра ҫак тема соцсетьсенче чи палли пулса тӑчӗ. Чӑваш Ен ЦУР пӗлтернӗ тӑрӑх, республикӑра пурӑнакансенчен соцсетьсемпе патшалӑх пулӑшӑвӗсем порталӗ – урлӑ картиш территорийӗсене юртан тирпейлессипе ҫыхӑннӑ 1300 ытла хыпар килсе ҫитнӗ», – тесе  палӑртса каланӑ Чӑваш Ен Пуҫлӑхӗ  Олег Николаев.

Чӑваш Енри Патшалӑх ҫурт-йӗр  инспекцийӗн ертӳҫи Виктор Кочетков  юрсене пухса тирпейлес тата пӑрпа кӗрешес ӗҫе йӗркелесси хӗллехи тапхӑрта чи ҫивӗч ыйтусенчен пӗри пулнине пӗлтернӗ. Уйрӑмах нумай хваттерлӗ ҫуртсем таврашӗнче тепре чухне тирпейсӗрлӗх хуҫаланнине курма пулать тесе асӑннӑ вӑл.

Ятарлӑ техника,  ҫуртсем ҫывӑхӗнче тирпейлесе тӑракан ҫынсем сахал пулнине кура,  хӗллехи тапӑрта тепре чухне юр нумай пухӑнса каять.   Юр нумай ҫунӑ чухне ҫуртсем таврашӗнчи территорисене вӑхӑтра тирпейлесе пыраймани сисӗнет. Управляющи компанисене час-часах халӑх кӑлтӑксем пирки аса илтерсех тӑма тӑрӑшать.    

Паянхи куна калас пулсан, 70 ед. техника хатӗрлесе тӑратнӑ.  Ятарлӑ техникӑсене аренда шучӗпе  илме 166 договор тунӑ. Апла пулсан, юр тасатма техника таврашӗ пур тетпӗр.   Управляющи компанисенчен ытларахӑшӗнче ҫуртсем таврашӗнчи территорисене тирпейлекенсен штачӗ 60% пуҫласа  85% таран  кӑна шуштланать.  Кӑтарту паллӑ, специалистсем ҫитменни куҫ кӗретех.  

2024 ҫулхи чӳк уйӑхӗн 1-мӗшӗнчен пуҫласа Чӑваш Ен  Патшалӑх ҫурт-йӗр  инспекцине 77  хыпар килнӗ. Вӗсенчен 40-шӗ юрсене вӑхӑтра пухса тирпейлеменнипе, 37-шӗ ҫулсен шуҫлакӗпе ҫыхӑннӑ. Чи нумай ҫӑхавсем Шупашкар хулисенчен (62) тата Ҫӗнӗ Шупашкартан (12) килнӗ, пӗрерӗн – Канаш хулинчен, Шупашкар тата Сӗнтӗрвӑрри округӗсенчен. Чӑваш Енӗн Патшалӑх ҫурт-йӗр инспекцийӗн инспекторӗсем тӳрремӗнех пӑхса тухнӑ ыйтусене шута илсе, планпа пӑхман 4 тӗрӗслев ирттернӗ, вӗсен кӑтартӑвӗсем тӑрӑх 3 предписани панӑ тата административлӑ правӑна пӑсни пирки 1 ӗҫ пуҫарнӑ.

«Хӗл кӑҫал япӑхах та мар иртет, юр та нумай ҫумасть, Шупашкарпа Ҫӗнӗ Шупашкар хушшинчи управляющи компанисен ӗҫне тарӑнрах тишкермелле. Яваплӑха туйса ӗҫлемесен чӗнсе  асӑрхаттарусем тумалла.  Граждансен пуҫаруллӑ хутшӑнӑвӗн формачӗ хальлӗхе ял территорийӗсенче  хастар пурнӑҫа кӗрсе пырать. Хула ҫыннисем  пуҫаруллӑ ӗҫсене хастар хутшӑнманни сисӗнкелет.  Апла пулсан, халӑхпа тӑтӑшах тӗл пулмалла, вӗсене кирлӗ пек хыпарсене пӗлтерсех пымалла»,  – тесе сӑмаха ҫавӑрнӑрегион Пуҫлӑхӗ.