1941-1945-мӗш ҫулсенче Тӑван ҫӗршывӑн Аслӑ вӑрҫинче Ҫӗнтерӳ тунӑранпа  80 ҫул ҫитнине палӑртса юбилей медалӗпе Галина Борисовна Лукьяновӑна, паттӑр  ентешӗмӗре Чӑваш Республикин Пуҫлӑхӗ Олег Николаев чысланӑ.

«Сирӗн истори – Ҫӗнтерӗве епле ҫӗнсе илнине аса илтерекен пулӑм.  Хамӑрӑн йӑх-несӗлӗмӗрсен паттӑрлӑхне ӗмӗр асра тытса, вӗсен паттӑрлӑхӗсем пирки  ҫитӗнекен ӑрӑва каласа хӑварассишӗн пирӗн пурин те тӑрӑшмалла.  Фронтра та, тылра та асаннесемпе асаттесем ырми-канми вӑй хурса, тӑшмана парӑнтарассишӗн кунне-ҫӗрне пӑхмасӑр ҫапӑҫнӑ», – тесе уйрӑммӑн палӑртса каланӑ  хӑйӗн саламӗнче Чӑваш Республикин Пуҫлӑхӗ Олег Николаев.  

Ҫӗр ҫинчи тӑнӑҫлӑхшӑн, ирӗклӗ ҫӗршывшӑн ҫапӑҫнӑ ҫынсен паттӑрла ӗҫӗсем нихӑҫан та манӑҫас ҫуккине асӑннӑ вӑл. Тӑван ҫӗршывӑн Аслӑ вӑрҫи ҫулӗсенче ҫывӑх ҫыннисем кӑтартнӑ паттӑрлӑхпа ҫыхӑннӑ ас тӑвӑм кашни килтех типтерлӗн сыхланса упраннине те каланӑ сӑмаха малалла тӑснӑ май регион Пуҫлӑхӗ.

Пирӗн паттӑр ентешӗмӗрсем пур фронтсенче те ҫапӑҫнине, хӗрарӑмсемпе ватӑсем тата ҫамрӑксем тылра хӑйсене шеллемесӗр ырми-канми ӗҫленине те палӑртнӑ вӑл.  

Вӑрҫӑ пуҫлннӑ чухне пӗчӗк Галина пурӗ те виҫҫӗре кӑна пулнӑ-ха.  Унӑн ашшӗ фронта кайсан, часах нимӗнле хыпарсӑрах ҫухалнӑ. Амӑшӗ выҫӑпа аптраса пурнӑҫран вӑхӑтсӑр уйрӑлса кайнӑ.  Пӗчӗк хӗре  – Галинӑна ачасен ҫуртне ӑсатнӑ.  Каярах ҫурта Владимирский облаҫне эвакуациленӗ.  Шӑпах та, унта вӑл хӑйӗн ачалӑхне ирттернӗ те.  Вӑл тапхӑрта пурӑнма пачах та, ҫӑмӑл пулман. Кашнине валеҫсе панӑ ҫӑкӑра чӑтӑмсӑррӑн кӗтсе выҫӑ чухне ӑша янӑ. Пӗр-пӗрин  ҫӑкӑр чӗлне  вӑрламан, пӗлнӗ ун чухнех пӗрне-пӗри хисеплемеллине, енчен те ют ҫӑкӑра илсен, тепри выҫӑпа аптрама пултарасса чухланӑ.

 Вӑрҫӑ вӗҫленсен Галина Борисовна тӗрлӗ предприятисенче вӑй хунӑ.  Каярах вара вӑл ГЭС тума Ҫӗнӗ Шупашкара таврӑннӑ.  Мӑшӑрӗпе пӗрле икӗ ача пӑхса ҫитӗнтерсе ура ҫине тӑратнӑ.  Халӗ вӗсем мӑнукӗсемпе савӑнса пурӑнаҫҫӗ.  Галина Борисовна обществӑлла ӗҫе хастар хутшӑнать.  Пӗтӗм Раҫҫейри сусӑрсен вырӑнти обществӑлла организацийӗнче  тӑрӑшать, ветерансен пурнӑҫӗ тата та лайӑхрах пултӑр тесе тимлет.

Аса илтерсе хӑваратпӑр,  нумаях пулмасть, ҫакӑн евӗр юбилей медалӗпе Куславкка тӑрӑхӗнче пурӑнакан ветерансене – Антонинӑпа Нина Лебедевӑсене туслӑ пурӑнакан аппӑшӗпе йӑмӑкне парса хавхалантарнӑ.