Республикӑра туризма аталантарас енӗпе ӗҫлекен координаци канашӗн ларӑвӗнче  кун пирки Чӑваш Ен Пуҫлӑхне Олег Николаева пӗлтернӗ.

 «Чӑваш Ен туристсен хушшинче  анлӑ сарӑлнӑ. 2024 ҫулхи пӗтӗмлетӳсем тӑрӑх Чӑваш Республики туризм юхӑмӗн  кӑтартӑвӗпе Раҫҫейӗн ТОП-5 регионне кӗнӗ. Туристсен юхӑмӗ 2024 ҫулхи  чӳк уйӑхӗн 1-мӗшӗ тӗлне, статистика кӑтартӑвӗсем тӑрӑх, 843 пин ҫынпа танлашнӑ, республикӑра ӗҫе кӗртнӗ Биг Дата пӗлтернӗ тӑрӑх, республикӑна 2024 ҫулта 991 пин ҫын килсе кайнӑ. Малтанхи хаклав, 2024 ҫулта асӑннӑ кӑтарту 2022 ҫулхипе пӑхас пулсан 1,7 хут ӳснӗ», – тесе уйрӑммӑн  палӑртса каланӑ хӑйӗн сӑмахӗнче Чӑваш Ен Пуҫлӑхӗ Олег Николаев.

3 ҫул хушшинче Чӑваш Ен ПФО регионӗсем хушшинче «Туризм юхӑмӗ» кӑтартупа рейтингра тата «КСРа вырнаҫнисен шучӗ» кӑтартупа 3 картлашка хӑпарнӑ.

РФ ВЭБ ПроГород «Большая Волга» проектӑн ертӳҫи Даниил Веретенников пӗлтернӗ тӑрӑх, макротерриторири турюхӑм калӑпӑшӗнче 13 регион хушшинче 1-мӗш вырӑн йышӑнать. «Историпе культура эткерлӗхӗ, ҫавӑн пекех этнографи тата ытти факторсем кӑсӑклантаракан ҫутҫанталӑк ландшафчӗсем турюхӑмӗн 2030 ҫул тӗлне ҫулталӑкра 1,46 млн ҫын таран ӳсӗмне прогноз тума май парӗҫ»  –  тенӗ вӑл.  Чӑваш Ен харӑсах виҫӗ приоритетлӑ  регионсен хушшинчи маршрутпа макротерриторине кӗнине асӑннӑ вӑл.

Экономика аталанӑвӗн министерстви пӗлтернӗ тӑрӑх, республикӑра ҫӗр каҫнисен шучӗ ӳсни 2020 ҫулхипе танлаштарсан 3,2 хут ӳснӗ. Ушкӑнпа вырнаҫтармалли хатӗрсенче вырнаҫтарнисен шучӗ – 2,4 хут (475 пин ытла ҫын) пулнӑ. Тупӑш вара 2024 ҫулта 3,9 хут ӳснӗ. Юханшыв транспорчӗпе килнӗ туризм юхӑмӗ 4 хута яхӑн нумайланнӑ. Карапсемпе  ҫӳреме кӑмӑл тӑвакансен  шучӗ вара – 3,4 хут чылайланнӑ.

2024 ҫулта Чӑваш Республикинче туризма 2035 ҫулччен аталантармалли Стратегине йышӑннӑ. «Туризм инфратытӑмне аталантарас» нацпроектӑн регион проекчӗ шайӗнче кану базисенче 3 пляж хатӗрленӗ, «Волжанка» санаторипе курорт комплексӗнче тата хула тулашӗнчи «Ради Лесара» хула тулашӗнчи отельте 2 бассейн туса лартнӑ, «Заимка» кану вырӑнӗнче валли 2 ача-пӑча комплексӗ вырнаҫтарнӑ.  Пӗр сӑмахпа каласан, туристсене валли хӑтлӑ условисем регионта хатӗрленӗ, вӗсем пурте паянхи пурнӑҫ таппипе тӳр килсе тӑраҫҫӗ.

Унсӑр пуҫне, иртнӗ ҫулта Вӑрмар муниципаллӑ округра  «Аруна» этнокультура паркӗн инженери тата туризм инфраструктурин объекчӗсене тума патшалӑх экспертизине илнӗ.  Канаш округӗнчи «Мокринский виадук» туризм-рекреаци площадкине  хута ярасси пирки ӗҫ хучӗсене йӗркелесе ҫитернӗ.

Вице-премьер – Чӑваш Енӗн экономика аталанӑвӗпе пурлӑх хутшӑнӑвӗсен министрӗ Дмитрий Краснов пӗлтернӗ тӑрӑх, 2025 ҫултанпа Шупашкарта, Ҫӗнӗ Шупашкарта тата Шупашкар муниципаллӑ округӗнче туризм налукне кӗртнӗ. Пухнӑ укҫа-тенкӗ турист инфраструктурине тытса тӑма тата аталантарма, туристсем ҫӳрекен вырӑнсене лайӑхлатма тӑкакланӗ.  

 «Мӗнпур палӑртса хунӑ плансене пурнӑҫа кӗртме ҫӗнӗ туризм маршручӗ йӗркелемелле. Ҫакӑ пур объекта та укҫа-тенкӗпе тивӗҫтермелли хушма ҫӑлкуҫсене илӗртме май парать. Сӗнӳсене хатӗрленӗ чухне палӑртнӑ кашни мероприятисен партнерӗ кам пулассине ӑнланмалла», – тесе сӑмаха ҫавӑрнӑ Чӑваш Ен Пуҫлӑхӗ Олег Николаев.

 РФ ВЭБ ПроГород  «Большая Волга» проектӑн ертӳҫи  Даниил Веретенников регионсен хушшинчи туризм схемине «Мӑн Волга» макротерритори валли территори-уҫлӑх планламалли схемӑна хатӗрлесси пирки пӗлтернӗ. Унӑн йышне Чӑваш Республикине шута илсе  тата 13 регион кӗнине хыпарланӑ.

Проект ертӳҫи ҫул-йӗр карттин формачӗпе тытӑмланӑ туризм тӗллевӗсем валли инфратытӑм аталанӑвӗ енӗпе сӗнӳсем туса ирттересси пирки ӗҫ пынине асӑннӑ.   Турсхемӑн тӗп тӗллевӗсенчен пӗри – регионсен административлӑ центрӗсенчен аякри пӗчӗк хуласемпе территорисене туризм ҫаврӑнӑшне явӑҫтарасси, ҫулҫӳревӗн вӑтам тӑршшӗне ӳстересси пулса тӑрать.

Туризма аталантармалли приоритетлӑ зонӑсем шутӗнче Чӑваш Еншӗн Шупашкар – Сӗнтӗрвӑрри, «Чӑваш Вӑрманӗ» парк, Улатӑр хулисене, Сӗнтӗрвӑрри тата Ҫӗрпӳ муиципаллӑ округӗсенчи турсхема приоритетлӑ проекчӗсене палӑртнӑ.

2030 ҫул тӗлне  Даниил Веретенников пӗлтернӗ тӑрӑх, номер фончӗн ӳсӗмӗ 3 пин тенкӗпе танлашма пултарасса, турюхӑм – 640 пин ытла пулассине каланӑ.