Кун пирки Чӑваш Ен Пуҫлӑхне Олег Николаева регионти агропромышленноҫ комплексӗн ветеранӗсен пӗрлешӗвӗн представителӗсем пӗлтернӗ. Тӗлпулӑва хутшӑнма общество пӗрлешӗвче тӑракан 30 ҫын – республикӑри кашни муниципаллӑ округӑн представителӗсем кӑмӑл тунӑ.

Тӑван ҫӗршывӑн Аслӑ вӑрҫинче Ҫӗнтерӳ тунӑранпа 80 ҫул ҫитнине палӑртса  АПК ветеранӗсем регионта «Ӑрусен патриотизм эстафети» ирттересси пирки сӑмах пуҫарнӑ.  Ҫӗнӗ проекта тӗпе хурса,  Тӑван ҫӗршывӑн Аслӑ вӑрҫин тата ятарлӑ ҫар операцийӗн ветеранӗсем паттӑрсем пирки уҫӑ уроксем ирттерме,  историлле  пулӑмсем ҫинчен тӗплӗнрех ҫитӗнекен ӑрӑва пӗлтерме килӗшнӗ. Кино тата видеоматериалсем кӑтартса ҫитӗнекен яш-кӗрӗме чӑнлӑх пирки тӗплӗн ӑнлантарса пама тӑрӑшӗҫ.  Пӗр сӑмахпа каласан, уроксенче патриотла тематикӑпа альбомсем ӑсталӗҫ. Кунсӑр пуҫне, ҫапӑҫу хирӗсенче пуҫ хунисене асӑнса лартнӑ палӑксене муниципаллӑ округсенче хӑтлӑлатса юсаса ҫӗнетесси те планра пур.  Тата, паллах, ветерансем ҫӑмӑл мар вӑхӑтра СВО хутшӑнакансене пулӑшаҫҫӗ: гуманитари пулӑшӑвӗ пухаҫҫӗ, маскировка сечӗсем яваҫҫӗ, ҫуртасем пӗҫереҫҫӗ тата ытти ӗҫсене те тӑваҫҫӗ.

Чӑваш Республикин  АПК ветеранӗсен союзӗн председателӗ Александр Самылкин общество организацийӗн пӗлтерӗшлӗ ӗҫӗсем ҫинчен хыпарланӑ, хуҫалӑх ертӳҫисем предприятисен пурнӑҫӗ пирки каласа кӑтартнӑ.

Халӗ Чӑваш Енри АПК ветеранӗсен союзӗнче – 600 ытла пайташ. Вӗсен тӗллевӗ – опыта ҫамрӑк ӑрӑва парасси. Союз ертӳҫи Александр Самылкин  общество организацийӗ умри тӗллевсене пурнӑҫа кӗртсе пырассипе хастар ӗҫлесе пынине палӑртнӑ.  АПК ветеранӗсем, вӗсен хушшинче вӑрҫӑ ачисем те, тыл ӗҫченӗсем те пур,  шкул ачисемпе тата студентсемпе тӑтӑшах тӗл пулаҫҫӗ, пур ӳсӗмри аграрисем хушшинчи  паха опытпа ылмашӑнас тӗллевпе регионти  чи пысӑк, малта пыракан ял хуҫалӑх предприятийӗсене ҫитсе килеҫҫӗ, ҫӗнӗлӗхсене курса ӗненеҫҫӗ.

 «Организацире паян АПК ветеранӗсем, вӗсем хӑйсем те пысӑк предприятисен ертӳҫисем шутланаҫҫӗ. Хальхи вӑхӑтри, чи пысӑк калӑпӑшлӑ проектсене пурнӑҫа кӗртме хастар тӑрӑшаҫҫӗ. Ку вара, ҫамрӑксемшӗн питӗ пӗлтерӗшлӗ тӗслӗх пулса тӑрать! Ман шутпа, ҫакӑн пек ӗҫлесе пырсан,  эпир лару-тӑрӑва майӗпен тата та лайӑхлатса пыма пултарайратпӑр. Ҫамрӑксене те ял пурнӑҫне хастартарах хутшӑнтарма витӗм кӳрейретпӗр!» – палӑртнӑ хӑйӗн сӑмахӗнче регион Пуҫлӑхӗ Олег Николаев.

Олег Николаев вӗсене республика пурнӑҫне, общество ӗҫне хастар хутшӑннӑшӑн тав тунӑ.

Тӗлпулура ял ҫыннисене хумхантаракан ыйтусене ҫӗкленӗ. Пуҫлӑх каланӑ тӑрӑх, ҫак ҫивӗч ыйтусенчен чылайӑшне татса панӑ та.  Чӑваш Республикин социаллӑ пурнӑҫпа экономика аталанӑвӗн 2030 ҫулчченхи Комплекслӑ программине пурнӑҫланӑ май регионӑн управлени команди ҫивӗч ыйтусене татса пама шанчӑклӑ ҫул-йӗр суйласа илнине  тепӗр хут асӑнса хӑварнӑ вӑл.  Аслӑ ҫулсенчи ветерансем кӑсӑкланакан ыйтусене татса парассипе  программӑра самай пысӑк ӗҫсем пӑхса хӑварнине те пӗлтернӗ Пуҫлӑх.