Чӑваш патшалӑх филармонийӗнче ирттернӗ паллӑ пулӑма Тӑван ҫӗршывӑн Аслӑ вӑрҫин ветеранӗсем, тыл ӗҫченӗсем, ятарлӑ ҫар операцине хутшӑннисем, ҫарпа патриот ҫул-йӗрӗн класӗсенче вӗренекенсем, общество деятелӗсем пухӑннӑ.

Аса илтеретпӗр, Чӑваш Республикинче 2025 ҫула Ҫӗнтерӳпе патриотлӑх ҫулталӑкӗ тесе пӗлтересси ҫинчен Чӑваш Республикин Пуҫлӑхӗ Олег Николаев  Указа алӑ пусса ҫирӗплетнӗ. 1941–1945 ҫулсенчи Тӑван ҫӗршывӑн Аслӑ вӑрҫинче Ҫӗнтерӳ тунӑранпа 80 ҫул ҫитнине палӑртса тата вӑрҫӑ ветеранӗсемпе тыл ӗҫченӗсен калама ҫук пысӑк паттӑрлӑхӗпе хастарлӑхне тата хӑйсене хӗрхенменлӗхне ӗмӗрлӗхе асра хӑварас тӗллевпе ҫапла палӑртма йышӑннӑ.

«Тӑван ҫӗршывӑн Аслӑ вӑрҫи ҫулӗсенче Ҫӗнтерӗве туптанӑ ҫынсене – фронтовиксене, тыл ӗҫченӗсене, блокадӑри Ленинградра пурӑнакансене, вӑрҫӑ ачисене – эпир уйрӑмах пысӑк тимлӗх уйӑратпӑр. Кашни ветеран патне ҫитмелле, вӗсене тимлӗх уйӑрмалла. Эпир вӗсенчен кашнин тӳпине пысӑка хурса хаклатпӑр, вӗсем пире Ҫӗнтерӳ парнеленӗ. Паянхи кун та, Тӑван ҫӗршыва хӳтӗлесе тӑшмана хирӗҫ тӑракан, ҫар ҫыннисем патне тимлӗх уйӑрмалла. Пирӗн ачасене хамӑрӑн аслӑ ӑру паракан йӑла-йӗркесене тата ӑс-хакӑлпа кӑмӑл-сипет хаклӑхӗсене тӗпе хурса пурӑнма вӗрентмелле», – тесе палӑртса каланӑ республика Пуҫлӑхӗ Олег Николаев.

Регион Ертӳҫи ятарлӑ ҫар операцине хутшӑнакансене патшалӑх наградисем парса чысланӑ, ҫар тивӗҫне пурнӑҫланӑ чухне кӑтартнӑ хӑюлӑхшӑн, паттӑрлӑхшӑн тата хӑйсене шеллемесӗр ӗҫленӗшӗн Руслан Валиева кӗҫӗн сержанта,  рядовой Алексей Ростовцева медальпе наградӑланӑ. Руслан Валиев СВО участникӗсене пулӑшнӑшӑн республика Пуҫлӑхне тата мӗнпур ҫыннине тав тунӑ. Чӑваш Енӗн ҫар ҫыннисем яланах тӳсӗмлӗхпе, паттӑрлӑхпа уйрӑлса тӑнине ҫирӗплетнӗ, республика вӗсемпе тивӗҫлипех мухтанма пултарнине каланӑ.

Зал, ура ҫине тӑрса, ӑшшӑн алӑ ҫупса тыл ӗҫченӗсене, вӑрҫӑра паттӑрлӑхпа палӑрнисене ытти ветерансене саламланӑ. Чӑваш Ен Пуҫлӑхӗ ветерансене паттӑрлӑхӗшӗн тав тунӑ, «1941–1945 ҫҫ. Тӑван ҫӗршывӑн Аслӑ вӑрҫинче Ҫӗнтернӗренпе 80 ҫул» юбилей медалӗсене парса чысланӑ.

Вӑрҫӑ ветеранӗсемпе инваличӗсене, тыл ӗҫченне, блокадниксене социаллӑ пулӑшу мерисем пама ҫулсерен 14 направленипе 2,3 миллиард тенкӗ ытла уйӑраҫҫӗ. Чӑваш Ен – «вӑрҫӑ ачисем» категорие тимлӗх уйӑрса 40 пин ҫынна, Ҫӗнтерӳ 80 ҫул тултарнӑ май 5 пин тенкӗ пӗр вӑхӑтра тӳлессине пурнӑҫа кӗртме йышӑннӑ. Республика бюджетӗнче кун валли 218 миллион тенкӗ ытла пӑхса хӑварнӑ.

Ҫитӗнекен ӑрӑва воспитани пама пулӑшакан пысӑк ӗҫ 2025 ҫулта малалла тӑсӑлӗ. Халӗ Чӑваш Енре кадет юхӑмӗ хастар аталанать, ҫамрӑк армеецсен 388 отрядне йӗркеленӗ. Регионта 68 шырав пӗрлешӗвӗ пур. «Авангард», «Воин» центрсенче ҫар-патриотлӑх енӗпе профильлӗ сменӑсем пур, унта ачасемпе паттӑрлӑх урокӗсене ирттереҫҫӗ. Ҫитӗнекен ӑрӑва, ҫара хутшӑннӑ хастарсем тӗрӗслӗх пирки, Тӑван ҫӗршывӑмӑра юратса пурӑнмаллине вӗрентеҫҫӗ.

Чӑваш Республикинче 2025 ҫулта Ҫӗнтерӳпе патриотлӑх ҫулталӑкне ирттерес енӗпе ӗҫлекен йӗркелӳ комитетне туса хунӑ. Чӑваш Республикинче 2025 ҫулта Ҫӗнтерӳпе патриотлӑх ҫулталӑкне ирттермелли тӗп мероприятисен планне ҫирӗплетнӗ. Истори астӑвӑмне сыхласа упрама тата ҫамрӑксене патриотла воспитани пама пулӑшакан ӗҫсене палӑртса чылай мероприяти ирттерме плана кӗртнӗ. Вырӑнти хӑй тытӑмлӑх органӗсене, йӗркелӳ-право тата харпӑрлӑх формине пӑхмасӑр организацисене Ҫӗнтерӳпе патриотлӑх ҫулталӑкӗ шайӗнче ирттерекен мероприятисене хастарлӑн хутшӑнма чӗнсе каланӑ регион Ертӳҫи. Массӑллӑ информаци хатӗрӗсене Ҫӗнтерӳпе патриотлӑх ҫулталӑкӗ шайӗнче ирттерекен мӗнпур мероприятисене тӑтӑшах ҫутатса тӑрас ыйту та приоритетлӑ шутланнине асӑннӑ.