Пӗтӗм Раҫҫейри «Раҫҫей йӗлтӗр йӗрӗ» чупу ҫӗршыври тӗп массӑллӑ тата курӑмлӑ хӗллехи спорт мероприятийӗ шутланать. Чӑваш Енре 2005 ҫултанпа палӑртнӑ мероприятине хаваслӑ лару-тӑрура ирттереҫҫӗ, кӑҫалхипе ӑна 21-мӗш  хут йӗркеленӗ. Чӑваш Енре мӗн пур ҫӗршыври пекех «Раҫҫей йӗлтӗр йӗрӗ» иртнӗ.

Тӗп старт Шупашкарта, хӗллехи спорт тӗсӗсен центрӗн базинче тунӑ биатлонпа йӗлтӗр комплексӗн территорийӗнче  иртнӗ. «Раҫҫей йӗлтӗр йӗрӗ» ӑмӑртӑва ку хутӗнче республика Правительствин пайташӗсемпе, Чӑваш Ен Патшалӑх Канашӗн депутачӗсем, организацисемпе предприятисен ертӳҫисемпе пӗрле Чӑваш Ен Пуҫлӑхӗ Олег Николаев та тухнӑ. «Пӗтӗм ҫӗршывпа пӗрле паян эпир «Раҫҫей йӗлтӗр йӗрӗ» ӑмӑртӑва хутшӑнатпӑр. Ку вӑл пур ӳсӗмри ҫынсене те сывӑ пурнӑҫ йӗркине хӑнӑхтаракан хӑватлӑ  мероприяти. Паян питӗ лайӑх трасса, йӗлтӗр чаплӑ шӑвать, ҫанталӑк  та аван.  Асӑннӑ мероприятине ҫӗнӗ биатлон центрӗнче пуҫласа пӗрремӗш хут ирттеретпӗр. Ҫакӑ уйрӑмах  пурсӑмӑра та хавхалантарать, кӑмӑла ҫӗклет. Ҫӗнелнӗ комплекс спорт объекчӗсен Пӗтӗм Раҫҫейри реестрне кӗнӗ, шанатӑп, вӑл йӗлтӗрпе чупассипе тата биатлонпа тӗнче шайӗнчи пысӑк ӑмӑртусем ирттермелли вырӑн пулса тӑрӗ. Пурне те  паян хаваслӑ кӑмӑл-туйӑм сунатӑп. Малалла та малалла, пӗрлӗхре вӑй!», – тенӗ вӑл.

Хӗллехи спорт уявӗ Чӑваш Енри мӗн пур округсенче халӑх йышлӑ хутшӑннипе иртнӗ. Йӑлана кӗнӗ йӗркепе республикӑра пӗр харӑс темиҫе пин ҫын старта тухнӑ. Спорта юратакансене уяв ячӗпе саламланӑ, ҫирӗп сывлӑх, вӑй-хӑват, хастарлӑх, ӑнӑҫу та ҫитӗнӳсем суннӑ регион Пуҫлӑхӗ.

Кӑҫал ҫӗршыври чи массӑллӑ йӗлтӗр стартне Тӑван ҫӗршывӑн Аслӑ вӑрҫинче Ҫӗнтерӳ тунӑранпа 80 ҫул ҫитнине, Тӑван ҫӗршыв Хӳтӗлевҫин ҫулталӑкне тата  Чӑваш Енри Ҫӗнтерӳпе патриотлӑх ҫулталӑкне  халалланӑ. Официаллӑ ҫынсемпе пӗрле старта ятарлӑ ҫар операцине хутшӑнакансем тата вӗсен мӑшӑрӗсемпе ачисем  те тухнӑ.

Унтан чи ҫамрӑк хутшӑнакансем валли 600 м тата шкул ачисем, студентсем, йӗлтӗр спортне юратакансем валли  2 ҫухрӑм  старт панӑ.

 Иртнӗ кану кунӗсенче ҫавӑн пекех иккӗмӗш хут «Сывлӑх кунӗ» иртнӗ. Республикӑра пурӑнакансенчен чылайӑшӗ спортзалсенче, бассейнсенче тата спортӑн ытти объекчӗсенче хастар канӑва суйланӑ.