Нумай хваттерлӗ ҫуртсенчи пӗтӗмӗшле пурлӑха тӗпрен юсамалли республика программине пурнӑҫланин пӗтӗмлетӗвӗсене тата 2025 ҫулхи тӗллевсене, Правительство ҫуртӗнче  Чӑваш Республикин Пуҫлӑхӗ Олег Николаев эрнесерен ирттерекен планеркӑра тарӑн сӳтсе явнӑ, тӗп кӑтартусемпе Сергей Новосельский нумай хваттерлӗ ҫуртсене тӗпрен юсав тӑвассипе ӗҫлекен республикӑри фондӑн генеральнӑй директорӗн ӗҫӗсене пурнӑҫлакан паллаштарнӑ.  

Кӗске вӑхӑтлӑха йышӑнса хӑварнӑ плана тӗпе хурса, 2024 ҫулта нумай хваттерлӗ 220 ҫурта тӗпрен юсаса ҫӗнетнӗ. Ҫав шутра 102 лифта улӑштарнӑ,  1,6 млрд тенкӗлӗх укҫа-тенкӗ тӑкакланӑ.

Сергей Новосельский каланӑ тӑрӑх кӗске вӑхӑтлӑх плана пурнӑҫламаннин сӑлтавӗ тӗпрен юсав ӗҫӗсене туса ирттермелли  тапхӑра каярахпа пурнӑҫлама килӗшӳ туни.   Тата тепӗр сӑлтавӗ ӗҫсен хакне пысӑклатни пулса тӑнӑ.  Сӑмахран, ӗҫе пурнӑҫламалли тапхӑра куҫарасси пирки йышӑнӑва нумай хваттерлӗ 61 ҫуртра пурӑнакансем йышӑнса хӑварнӑ, 33-шӗпе конкурс процедурисем ирттернӗ, ӗҫсене пурнӑҫлама договорсем алӑ пуснӑ, ҫанталӑк условийӗсем лайӑхланса пырсан, 29 ҫуртра юсав ӗҫӗсем тытӑнӗҫ.

2025 ҫулта республикӑра нумай хваттерлӗ 400 ҫуртра тӗпрен юсав ирттерме палӑртнӑ. Ҫав шутра нумай хваттерлӗ  61 ҫуртра 227 лифта улӑштарма плана кӗртнӗ.

 «Хальхи вӑхӑтра Фонд нумай хваттерлӗ ҫуртсенчи пӗтӗмӗшле пурлӑха тӗпрен юсассипе ҫыхӑннӑ ӗҫсене пурнӑҫламалли подряд организацийӗсене суйласа илмелли конкурс процедурисем ирттерет,  проектпа смета документацийӗ тума договорсем хатӗрлесе ҫитернӗ», – тесе  пӗлтернӗ фонд ертӳҫин тивӗҫӗсене пурнӑҫлакан.

Чӑваш Республикин строительство министрӗн ӗҫӗсене пурнӑҫлакан Владимир Максимов сӑмаха малалла тӑснӑ май,  2024 – 2026-мӗш ҫулсем валли пӑхса хӑварнӑ план питӗ калӑпӑшлӑ пулнине асӑннӑ.  Унчченхи виҫӗ ҫуллӑх планӗпе танлаштарас пулсан, программӑна кӗртнӗ ҫуртсен пӗтӗмӗшле йышӗ 560 таран пысӑкланнӑ. Малтан  587 ҫурт пулнӑ пулсан, хальхи программӑна   нумай хваттерлӗ 1047 ҫурта кӗртнӗ.  

 «Пӗлтӗр регион Фондне укҫа-тенкӗ явӑҫтармалли калӑпӑша хушма майпа ӳстерме май памалли чылай саккун виҫине йышӑннӑ. Паллах, ҫак мероприятисен кӑтартӑвӗсем тӑрӑх Фонд ҫулталӑкӗпе 200 миллион тенкӗ  хушма тӗрев илӗ. Программӑна тата та тухӑҫлӑрах тӑвас тесессӗн, тепӗр хут тарӑн тишкермелле.  Кӗске вӑхӑтлӑха йышӑннӑ планри ҫуртсенчен пурне те тӗпрен юсв ӗҫӗсене туса ирттермелле мар тен.  Патшалӑх ҫурт-йӗр инспекцийӗпе пӗрле ҫуртсене тӗплӗн пӑхса тухса, кирлӗ пек йышӑнусем туса хӑвармалла.  Программӑн тухӑҫлӑхне ӳстермелле», –  кун пирки тепӗр хут палӑртса каланӑ Чӑваш Республикин строительство министрӗн ӗҫӗсене пурнӑҫлакан.