Чӑваш Ен Пуҫлӑхӗ  РФ культура министрӗпе республикӑри культура пайӗнчи аталану ҫул-йӗрӗсене сӳтсе явнӑ, пуласлӑхи тӗллевсене пӑхса тухнӑ, ҫитӗнӳсем пирки канашланӑ.

Калаҫӑва пуҫарнӑ май, Олег Николаев кӑҫал СССР летчик-космонавчӗн А. Г. Николаевӑн Шуршӑлти мемориал комплексӗн масштаблӑ реконструкцийӗ пуҫланнине хыпарланӑ.  Строительство ӗҫӗсене вӗҫленӗ хыҫҫӑн, 2027 ҫулта комплекса  паянхи пурнӑҫ таппипе килӗшсе тӑракан хатӗрсемпе тивӗҫтерессе каланӑ. Ҫӗнелнӗ музейра Регионсен хушшинчи музейпа вӗрентӳ центрӗ йӗркелеме палӑртнӑ.

Ҫавӑн пекех республика планӗсенче – музейсене, культура учрежденийӗсене юсаса ҫӗнетес ӗҫе малалла тӑсасси, ача-пӑча ӳнер шкулӗсене тӑвасси тата ҫӗнетесси.  Кун йӗркинчи ыйтусем ҫавӑн пекех – А. Н. Тогаев композитор пурӑннӑ ҫурта реставрацилесси, Шупашкарти музыка училищин вӗренӳ корпусӗн тата общежитине тӗпрен юсасси, Патӑрьелӗнчи ача-пӑча искусствин шкулне  ҫӗнетесси.

Уҫӑ калаҫу вӑхӑтӗнче  «Ҫемье хаклӑхӗсемпе инфратытӑм культури»  регионти проекта  «Ҫемье» ҫӗнӗ нацпроекта Патӑрьелти ача-пӑча искусствин шкулне  кӗртсе хӑварасси пирки те канашланӑ. СССР халӑх артисчӗ Андрей Яковлевич Эшпай ҫуралнӑранпа ҫӗр ҫул ҫитнине халалланӑ Юрий Башмет ертсе пыракан «Ҫӗнӗ Раҫҫей» патшалӑх симфони оркестрӗн концертне Чӑваш Енре ирттересси пирки те сӑмахланӑ. Палӑртса хӑваратпӑр, паллӑ артистӑн шӑпи Чӑваш Енпе самай ҫыхӑннӑ.

 «Регион министерствипе ӗҫлес опыт пирӗн питӗ лайӑх.  «Ҫемье» нацпроект шайӗнче малалла та мероприятисене йӗркелесе пыма витӗм кӳрӗпӗр, культура учрежденийӗсене хӑтлӑлатма пулӑшӑпӑр», – палӑртнӑ РФ культура министрӗ Ольга Любимова.

Ҫавӑн пекех вӑл «Пушкин картти» программӑна пурнӑҫа кӗртес ӗҫре Чӑваш Ен пысӑк ҫитӗнӳсем тунине палӑртнӑ, республика  Раҫҫейре  малта пыраканни тенӗ, регионта карттӑпа усӑ курма кӑмӑл тӑвакан ҫамрӑк яш-кӗрӗм чылай  пулнине те асӑннӑ  вӑл.  

 «Министр Чӑваш Республикин культура сферинчи ӗҫне пысӑка хурса хакларӗ. Юлашки тӑватӑ ҫулта Чӑваш Енри 400 ытла объект «Культура» нацпроектпа пулӑшу илчӗ. РФ Культура министерстви пирӗн пӗтӗм ҫӗнӗ проектсене ырлать, вӗсене пурнӑҫа кӗртме пулӑшса пырать», – палӑртнӑ Чӑваш Ен Пуҫлӑхӗ Олег Николаев.