Вӑрмар округӗнче иртнӗ Правительство кунӗнче Чӑваш Енри чи пысӑк аслӑ шкулсемпе муниципалитет пӗр-пӗринпе тачӑ ҫыхӑнса ӗҫлеме килӗшӗве алӑ пусса ҫирӗплетнӗ
Вӑрмар округӗнче Правительство кунӗ иртнӗ. Кунта пурӑнакансене Чӑваш Республикин 2025 – 2030-мӗш ҫулхи социаллӑ пурнӑҫпа экономика аталанӑвӗн комплекслӑ программипе паллаштарнӑ, муниципалитет пӗрлӗхне аталантармалли пӑхса хунӑ плансем ҫинчен каласа панӑ. Республикӑн тата муниципалитетӑн управлени команди умӗнче тӑракан тӗллевсем пирки Дмитрий Краснов, Максим Иванов, Владимир Степанов Чӑваш Республикин вице-премьерӗсем, Чӑваш Республикин культура министрӗн пӗрремӗш ҫумӗ Татьяна Казакова, ял хуҫалӑх министрӗн тивӗҫӗсене пурнӑҫлакан Инна Волкова, финанс министрӗн пӗрремӗш ҫумӗ Ольга Метелева каласа кӑтартнӑ.
Чӑваш Республикин Пуҫлӑхӗ Олег Николаев муниципалитет лайӑх аталанса вӑй илсе пынине палӑртнӑ.
«Вӑрмар муниципаллӑ округӗ юлашки пилӗк ҫул хушшинче ҫирӗп аталанса пырать. Ӑна малалла аталантарма питӗ лайӑх никӗс хывнӑ тата малалла та хӑватлӑн аталанса пырас текен кӑмӑл пысӑк пулни курӑнать. Аса илтеретӗп, совет саманинче Вӑрмар районӗ хӑйӗн промышленноҫӗпе чапа тухнӑ. Кунта сӗтел-пукан туса кӑларнӑ, ҫӗвӗҫсене валли производство пулнӑ, республикӑри чи пысӑк аталаннӑ районсенчен пӗрин шутне кӗнӗ. Паян та «Аквапром» производствӑна пула, округӑн пуласлӑх аталанӑвӗн шанӑҫӗ пысӑк», – тесе палӑртса каланӑ хӑйӗн сӑмахӗнче регион Пуҫлӑхӗ Олег Николаев.
Олег Николаев округӑн администраци ертӳлӗхне утӑ уйӑхӗн 1-мӗшӗччен Вӑрмар муниципаллӑ округӗн 2030 ҫулчченхи анлӑ аталанӑвӗн стратегине хатӗрлеме, ӑна Чӑваш Республикин Социаллӑ пурнӑҫпа экономика аталанӑвӗн 2025–2030-мӗш ҫулсенчи Комплекслӑ программине тӗпе хурса пурнӑҫламаллине хушнӑ, ҫав шутра халӑх пурӑнакан вырӑнсен тӗрев пайӗсене аталантарас, 2025 ҫулхи пуш уйӑхӗн вӗҫӗччен мероприятисен планне («ҫул-йӗр карттине») туса хатӗрлеме каланӑ. Ҫулталӑк хушшинче шывпа тивӗҫтермелли объектсене хута ямалла, проектсене палӑртнӑ йӗркепе хатӗрлесе ҫирӗплетмеллине аса илтернӗ. Чӑваш Ен Пуҫлӑхӗ 53 ҫемьене (9 ҫамрӑк ҫемье, 32 тӑлӑх ача, 12 нумай ачаллӑ ҫемье) пурӑнмалли ҫурт-йӗр условийӗсене лайӑхлатма, ҫавӑн пекех нумай ачаллӑ 165 ҫемьене ҫӗр лаптӑкне харпӑрлӑха илме социаллӑ пулӑшу мерисемпе тивӗҫтерме тӗллев лартнӑ.
Чӑваш Республикин социаллӑ пурнӑҫпа экономика аталанӑвӗн комплекслӑ программи шайӗнче 2030 ҫулччен Вӑрмар муниципаллӑ округӗнче 840 млн тенкӗлӗх 13 инвестици проектне, туризм, строительство тата ЖКХ енӗпе 79 инфраструктура проектне, потребитель рынокӗпе пулӑшу ӗҫӗсен, сывлӑх сыхлавӗн, культурӑпа спорт сферине пурнӑҫлама палӑртнӑ. Экологи ыйтӑвӗсем ҫине те тимлӗх уйӑрма чӗнсе каланӑ, халӑха хӑрушсӑрлӑхпа тивӗҫтересси ыйту та приоритетлӑ тесе асӑннӑ.
Вӑрмар муниципаллӑ округӗн территорийӗсене 12 мегапроектпа пӗр проект-драйвера пурнӑҫа кӗртме тӗллев лартнӑ. Йӑлари хытӑ каяшсене пухса тирпейлесси, шыв ыйтӑвӗсене уҫӑмлатасси, вӗрентӳ пайне ҫӗнетсе пырасси, пӗр сӑмахпа каласан социаллӑ пӗлтерӗшлӗ объектсене хута ярасси ыйтусем малти вырӑна тухса тӑраҫҫӗ.
Проект-драйвер автоматизациленӗ цех тума шантарать, «Аквапром» ТМЯО гидроаккумуляторсем туса кӑлармалли хатӗрсем туянма май парать.
Правительство кунӗнче Вӑрмар округӗн 2020 – 2024-мӗш ҫулсенчи социаллӑ пурнӑҫпа экономика аталанӑвӗн кӑтартӑвӗсемпе тата 2025 – 2030-мӗш ҫулсем валли пӑхса хӑварнӑ тӗллевсемпе Вӑрмар муниципаллӑ округӗн пуҫлӑхӗ Василий Шигильдеев тӗплӗн паллаштарнӑ.
Юлашки пилӗк ҫулта 2,1 хут налук тупӑшӗсем ӳснӗ, 1,7 хута яхӑн – налук мар тупӑшсем нумайланнӑ, ваккӑн суту-илӳ ҫаврӑнӑшӗ 1,6 хут хӑпарнӑ.
Вӑрмар тӑрӑхӗнче пурӑнакансен чылай ыйтӑвне туллин татса панӑ тесен те тен йӑнӑшах мар пулӗ. Аавтоҫулсене тирпейлесе ҫитернӗ, ҫурран утакансене валли тротуарсем таврашӗнче ҫутӑсем тунӑ, икӗ шкулта тӗпрен юсав ирттернӗ, ача сачӗсемпе шкулсене ҫӗнетсе пынӑ, хальхи пурнӑҫпа килӗшсе тӑракан техникӑпа тивӗҫтернӗ, спортзалсене, Вӑрмарти тӗп больницӑна юсанӑ, тавралӑха тирпей-илем кӗртнӗ.
Правительство кунӗнче Вӑрмар муниципаллӑ округӗн Администрацийӗпе Чӑваш патшалӑх аграри университечӗ, И.Я. Яковлев ячӗллӗ Чӑваш патшалӑх педагогика университечӗ тата И.Н. Ульянов ячӗллӗ Чӑваш патшалӑх университечӗ килӗштерсе ӗҫлесси пирки килӗшӗве алӑ пусса ҫирӗплетнӗ. Тӗп тӗллевсенчен пӗри Вӑрмарта Аслӑ шкулсен представительствисене уҫасси пулӗ.
Олег Николаев, округра пурӑнакансене лайӑх ӗҫленӗшӗн мухтаса тав сӑмахӗсем каланӑ. «Эпир малашне те чылай кӑсӑклӑ пуҫарусене пулӑшма хатӗр. Паян питӗ кӑмӑллӑ, харӑсах виҫӗ ректор пӗр пулӑма хутшӑнаҫҫӗ. Килӗшӗве алӑ пусса ҫирӗплетеҫҫӗ. Вӑрмар муниципаллӑ округӗнче ҫынсем ҫав тери хастар. Паха проектсем пӑхса хӑварнӑ. Ҫитӗнӳсем нумай, анчах паянхи куна илес пулсан, хӑш-пӗр татса паман ыйтусем те пур-ха. Эпир вӗсемпе кашнинпе тачӑ ӗҫлӗпӗр. Пирӗн тӗллев – пӗр-пӗр объект тӑвасси кӑна мар, пурӑнакансене валли пурӑнма хӑтлӑ условисем йӗркелесе парасси те», – тенӗ Пуҫлӑх.