Ҫӗрпӳ муниципаллӑ округӗнче Правительство кунӗнче Олег Николаев вырӑнти «ВДС» ООО чӑх-чӗп фабрикине ҫитсе курнӑ, цех ӗҫӗпе паллашнӑ. Предприяти ҫулталӑкне 2 пин тонна тавар тирпейлесе кӑлайрайрать.  Регион Пуҫлӑхӗ пулӑшнипе республика бюджетӗнчен тулли цикл производствине пурнӑҫлама субсидисем уйӑрнӑ: ҫӑмартаран пуҫласа чӗп инкубацийӗ валли, чӗрӗ кайӑкран пуҫласа экологи тӗлӗшӗнчен таса апат-ҫимӗҫ  тирпейлесе кӑларма тӑкакланасси паллӑ. «ВДС» ТМЯП экологи енчен хӑрушсӑр аш-какай туса илессин концепцине малалла тӑсать: кайӑка натураллӑ выльӑх апачӗ ҫинче искусствӑлла хутӑшсемсӗр ӳстереҫҫӗ.

Ҫавӑн пекех регион ертӳҫи электротехника корпусӗсем хатӗрлекен тата туса кӑларакан тулли цикл предприятине ҫитсе курнӑ, унта 2025-2026 ҫулсенче 100 млн ытла тенкӗлӗх инвестпроект пурнӑҫланать. «Меко» ООО Чӑваш Республикинче пысӑк пӗлтерӗшлӗ организацисен переченьне кӗрет.

Правительство кунӗнче  Чӑваш Республикин Пуҫлӑхӗ Олег Николаев муниципалитет аталанма лайӑх тенденци кӑтартнине палӑртнӑ.

 «Ҫӗрпӳ округӗ яланах хӑватлӑ производство вӑй-хӑвачӗпе тата вӑйлӑ ял хуҫалӑхӗпе палӑрнӑ. Халӗ вара округӑн малалла талпӑнма хушма май тупӑннӑ: вӑл Шупашкар агломерацийӗн 6 муниципалитечӗн йышне кӗнӗ. Пирӗн тӗллев  – кӗске вӑхӑтрах округри мӗнпур аспектпа ҫыхӑнтарас тесе пӗрлехи инфраструктура экосистеми йӗркелесси. Ҫакӑ халӑхӑн пӗтӗм территорийӗнчи пысӑк мобильлӗхне тата палӑртса хунӑ проектсене пурнӑҫлама лайӑх пулӑшу парӗ. Шупашкар, Ҫӗрпӳ округӗ  халӑхшӑн пурӑнма чи илӑртӳллӗ вырӑнсенчен пӗрисем пулӗҫ», – тесе каланӑ  Чӑваш Ен Пуҫлӑхӗ.  

Республикӑн тата муниципалитетӑн управлени команди умӗнче тӑракан ытти тӗллевсем ҫинчен Максим Иванов, Владимир Степанов вице-премьерсем, культура министрӗ Светлана Каликова, ял хуҫалӑх министрӗн тивӗҫӗсене пурнӑҫлаканнӗ Инна Волкова, экономика министрӗн тивӗҫӗсене пурнӑҫлакан Лариса Рафикова, финанс министрӗн пӗрремӗш ҫумӗ Ольга Метелева тӗплӗн каласа кӑтартнӑ.

2020–2024-мӗш ҫулсенчи ӗҫсен пӗтӗмлетӗвӗпе  Ҫӗрпӳ МО Правительство кунӗнче Ҫӗрпӳ муниципаллӑ округӗн пуҫлӑхӗ Алексей Иванов паллаштарнӑ, 2025–2030-мӗш ҫулсем валли палӑртнӑ тӗллевсем ҫинчен каласа кӑтартнӑ.

Юлашки пилӗк ҫулта налук пухассипе  кӑтарту 1,5 хут ӳснӗ. Муниципаллӑ округсем хушшинче Ҫӗрпӳри  муниципаллӑ округра  инвестици хывассин кӑтартӑвӗ ытти чухнехинчен самай лайӑхланнӑ.

Чӑваш Республикин  2030 ҫулччен  пӑхса хӑварнӑ социаллӑ пурнӑҫпа экономика аталанӑвӗн комплекслӑ программине  тӗпе хурса,  Ҫӗрпӳ муниципалитет округӗнче 25 млрд ытла тенкӗлӗх 22 инвестици проектне пурнӑҫлама палӑртнӑ, туризм, агропромышленноҫ комплексӗ, строительство тата ЖКХ, транспорт, сывлӑх сыхлавӗ, физкультура тата спорт енӗпе 81 инфраструктура проектне пурнӑҫа кӗртесси те планра пур.  Вӗренӳ, культура, социаллӑ сфера тата ӗҫ, экологи рынокӗ, ҫавӑн пекех пурнӑҫ хӑрушсӑрлӑхӗ ыйтусем те кун йӗркинчех тӑраҫҫӗ.

 Олег Николаев  вырӑнти администрацине утӑ уйӑхӗн 1-мӗшӗччен Ҫӗрпӳ муниципаллӑ округӗн 2030 ҫулчченхи анлӑ аталанӑвӗн стратегине, Чӑваш Республикин социаллӑ пурнӑҫпа экономика аталанӑвӗн 2025–2030-мӗш ҫулсенчи Комплекслӑ программине пурнӑҫлассине, ҫав шутра халӑх пурӑнакан вырӑнсен тӗрев аталанӑвне тивӗҫтерес шайра туса хатӗрлеме хушнӑ. 2025 ҫулхи пуш уйӑхӗ вӗҫлениччен Чӑваш Республикин агропромышленноҫ комплексӗн 2030 ҫулчченхи тапхӑрти аталанӑвӗн стратегине пурнӑҫламалли мероприятисен планне туса хатӗрлемелле. Ҫулталӑк хушшинче выльӑх-чӗрлӗх отрасльне аталантарма пулӑшакан инвестици проекчӗсене пурнӑҫламалла, Патшалӑх ял хуҫалӑх программин тӗллевлӗ индикаторӗсене пурнӑҫламалла.