Пуш уйӑхӗн 19-мӗшӗнче патшалӑх влаҫ органӗсен представителӗсем республикӑри муниципалитетсемпе ӗҫ коллективӗсенче пулнӑ, регионта Пӗрлӗхлӗ информаци кунӗ иртӗ май, халӑха общество территорийӗсене 2020 ҫултанпа тирпей-илем кӗртессипе туса ирттернӗ ӗҫсемпе паллаштарнӑ,  ҫӗр законодательствин улшӑнӑвӗсем пирки каласа кӑтартнӑ,  ҫурхи шыв-шур вӑхӑтӗнче тимлӗхе ҫухатма юраманни ҫинчен асӑрхаттарнӑ.  Хӑрушсӑрлӑх теми малти вырӑна тухмаллине асӑннӑ информаци ушкӑнӗсен ертӳҫисем.

Пӗрлехи информаци кунӗн тӗп теми ҫул сечӗсен аталанӑвне тата общество территорийӗсене пилӗк ҫуллӑх тапхӑрта тирпей-илем кӗртессине пӗтӗмлетни пулса тӑнӑ.

Юлашки 5 ҫулта регионти ҫулсене, кӗперсене тата ҫул пӑрӑхӗсене юсас хӑвӑртлӑх унчченхи пилӗкҫуллӑхпа танлаштарсан 50% ытларах ӳснӗ. Ҫак тапхӑрта республикӑна 62 ҫухрӑм автомобиль ҫулӗсем тунӑ тата юсаса ҫӗнетнӗ, 2,4 пин ҫухрӑм ҫул-йӗре тирпейленӗ, 19 кӗпер сооруженийӗ йӗркисене юсаса ҫӗнетнӗ, халӑх пурӑнакан вырӑнсенчи ҫулсене ҫутӑпа тивӗҫтернӗ.  Кӑтарту пысӑк. Ҫулсене тума, юсама тата тытса  ҫӗнӗрен сарма 38 миллиард тенкӗ бюджетран тӑкакланнӑ. 2025 ҫулхи плансенче – 60 ҫухрӑм регион тата муниципалитетсем хушшинчи автомобиль ҫулӗсене, вырӑнти пӗлтерӗшлӗ 96 ҫухрӑм ҫула, ҫавӑн пекех 8,8 км – Шупашкар агломерацийӗн чиккисенче юсасси, ял хутлӑхӗнче 11,4 ҫухрӑм ҫул тӑвасси. Унсӑр пуҫне 3 кӗпере юсама палӑртнӑ. Чӑваш Республикин Ҫул-йӗр фончӗн бюджет укҫин калӑпӑшӗ ҫак тӗллевпе 8,6 млрд тенкӗпе танлашӗ.

2020–2024 ҫулсенче Чӑваш Енре «Хӑтлӑ хула хутлӑхӗ» нацпроекта  тӗпе хурса  федераллӑ проект шайӗнче 180 обществӑлла территорисене тирпейленӗ.  Парксем, скверсем, аллейӑсем, ача-пӑча тата спорт площадкисем, ҫуран ҫӳремелли зонӑсем тунӑ.  Ҫав шутра ҫак ҫулсенче Тӑван ҫӗршывӑн Аслӑ вӑрҫине халалланӑ 13 мемориал комплексне хӑтлӑх кӗртсе йӗркеленӗ. 2025 ҫулта республикӑра тата 27 уҫлӑх улшӑнӗ, Ҫӗмӗрле, Йӗпреҫ, Тӑвай, Пӑрачкав, Вӑрмар округӗнче Тӑван ҫӗршывӑн Аcлӑ вӑрҫинче пуҫне хунӑ паттӑрсене асӑнса  ятарлӑ вырӑнсем хута яма палӑртнӑ.   

Хӑтлӑ йӗркеленнӗ обществӑлла уҫлӑхсен хушшинче пӗчӗк хуласемпе историллӗ тӑрӑхсенче хӑтлӑ хула хутлӑхне йӗркелемелли чи лайӑх проектсен Пӗтӗм Раҫҫейри конкурсӗн ҫӗнтерӳҫисем те пур. 2020 ҫултанпа 13 проект-ҫӗнтерӳҫӗ  пулса тӑнӑ.  Кӑҫал Сӗнтӗрвӑрри тата Канаш хулисенче проектсене пурнӑҫа кӗртесси вӗҫленӗ, Ҫӗрпӳ тата Етӗрне хулисенче ӗҫсем пуҫланаҫҫӗ. Кӑҫалхи конкурса республикӑран Пӑрачкав сали хутшӑнӗ.

Ака уйӑхӗн 21-мӗшӗнчен пуҫласа ҫӗртмен 12-мӗшӗччен Пӗтӗм Раҫҫейри онлайн сасӑлавра ҫӗнӗ нацпроект шайӗнче хӑтлӑх кӳрекен ҫӗнӗ объектсемшӗн «Пурнӑҫ валли инфраструктура» республика ҫыннисем 2026 ҫулта ҫӗнетме тата 25 территори суйлӗҫ. Вӗсемшӗн сасӑлама граждансен  пуш уйӑхӗн 23-мӗшӗччен Патшалӑх пулӑшӑвӗсен порталӗнче май пулӗ.

Чӑваш Ен Пуҫлӑхӗ Олег Николаев халӑха саккунсен улшӑнӑвӗсем ҫинчен ҫийӗнчех пӗлтерсе тӑмаллине, муниципалитетсенчи ҫӗр надзорӗн инспекторӗсен квалификацине ӳстерме витӗм кӳмеллине каланӑ.  «Кашнин хӑйсене шанса панӑ ӗҫе яваплӑха туйса, саккунсене пӑхӑнса, халӑхӑн ырлӑхӗшӗн ырми-канми тӑрӑшмалла», –  палӑртнӑ регион Пуҫлӑхӗ Олег Николаев.