Шупашкарта «Пӗрлӗхлӗ Раҫҫей»  Пӗтӗм Раҫҫейри политика партийӗн Чӑваш регион уйрӑмӗн муниципаллӑ депутачӗсен I Форумӗ иртнӗ.

Чӑваш Республикин Пуҫлӑхӗ Олег Николаев депутатсем умӗнче калаҫнӑ май,  Форум ӗҫ тӑвакан влаҫшӑн саккун кӑларакан влаҫ представителӗсемпе тата общественноҫпа парти площадкисенче хутшӑнса ӗҫлеме витӗм кӳнине палӑтнӑ.  Чӑваш Ен Пуҫлӑхӗ шӑпах муниципалитет шайӗнчи депутатсем республикӑра пурӑнакансемпе кашни кун ҫывӑх хутшӑнакансем пулнине, ҫынсене хумхантаракан мӗнпур ҫивӗч ыйту пирки пӗлнине палӑртнӑ.

Олег Николаев депутатсене наци тата регион проекчӗсене пурнӑҫа кӗртес ӗҫ епле  пулса пынине  общество тӗрӗслевне  туса пыма чӗнсе каланӑ.

 «Пирӗн пӗрлехи ӗҫрен аталанӑвӑн ҫӗнӗ ҫул-йӗрӗсене шырани тухӑҫлӑхӗ курӑнать. Пӗрле вӑй хуни республикӑн комплекслӑ аталанӑвне, кӑтартусен тухӑҫлӑхӗпе палӑрма май парать.  Ку процеса депутатсем кӑна мар, Чӑваш Республикинче пурӑнакан кашни ҫын хутшӑнмалла.  Пӗр-пӗрне ӑнланса ӗҫлесен, пулӑшсан, вӑй-хала пӗрлештерсен кӑна йывӑрлӑхсене  парӑнтарма пулать.  Пирӗн ӗҫ планне депутатсем хастар хутшӑнни сисӗнет.  Проектсене пурнӑҫа кӗртсе пырас ӗҫн те вӗсем хастар хутшӑнаҫҫӗ.  Обществӑна анлӑрах тӗрӗслесе тӑмалли пирки эпӗ пӗрре мар каланӑ. Депутатсенчен чылай килет, пирӗн пуласлӑх епле пуласси. Ҫакӑн пек килӗштерсе ӗҫлени ума лартнӑ тӗллевсене пурнӑҫлама кӑна мар, пӗр-пӗрне шанма та, сӑмах май тата ӗҫ тума та пулӑшӗ», - тенӗ Олег Николаев.

Чӑваш Республикин  социаллӑ пурнӑҫӗпе экономика пирки сӑмахланӑ май, Олег Николаев регион аталанӑвӗн тӗп пӗтӗмлетӗвӗсем юлашки 5 ҫулта регионти апат-ҫимӗҫ 1,8 хут ытла ӳснине палӑртнӑ. 2024 ҫулта пӗрремӗш хут республикӑри предприятисемпе граждансенчен налук енӗпе пухӑнакан укҫа-тенкӗ бюджет тӑкакӗсенчен пысӑкрах пулнӑ. Ҫакӑ регион хӑй ҫителӗклӗ таран аталанса пынине, умра тӑракан тӗллевсене тухӑҫлӑрах татса пама пултарнине ҫирӗплетет.

 Ҫавӑн пекех экономика аталанӑвӗн ҫул-йӗрӗсенчен пӗри - пуҫаруллӑ бюджетировани программи. Пӗлтӗр пуҫаруллӑ бюджет шайӗнче 2,3 млрд ытла тенкӗлӗх 1477 проект пурнӑҫланӑ. Кӑҫал ҫулталӑк пуҫланнӑранпа 3,3 млрд ытла тенкӗлӗх 1555 проект хута янӑ.

Республика Правительстви саккун кӑларакан влаҫа  ҫынсемпе кулленех уҫӑ пулма,  вӗсен пуҫаруллӑ проекчӗсене пурнӑҫа кӗртме витӗм кӳме чӗнсе каланӑ, халӑха ытларах палӑртса хунӑ ӗҫсене явӑҫтарма хушнӑ.