Чӑваш Республикин Пуҫлӑхӗ Олег Николаев тата Раҫҫей Федерацийӗн МЧСӗн министрӗ Александр Куренков генерал-лейтенант ӗҫлӗ тӗлпулу ирттернӗ.  Ертӳҫӗсем Раҫҫей МЧСӗн Чӑваш Енри Управленийӗн ӗҫ-хӗлне пӑхса тухнӑ, пушар хӑрушсӑрлӑхӗпе ҫыхӑннӑ ыйтусем тавра канашланӑ, оперативлӑ службӑсен ӗҫне тата чрезвычайлӑ лару-тӑру сиксе тухсан, ӑна сирсе ярассипе ҫыхӑннӑ самантсем пирки чарӑнса тӑнӑ.     

Ака уйӑхӗн 1-мӗшӗнчен Чӑваш Республикин территорийӗнче пушара хирӗҫле ятарлӑ режим кӗртнӗ. Вӑрман пушарӗсене асӑрхаттарассипе ҫыхӑннӑ мероприятисен пӗтӗм комплексӗ пурнӑҫланать, пушарпа кӗрешекен техникӑ ҫителӗклӗ, профилактика ӗҫӗсене вӑхӑтра ирттереҫҫӗ, пӗтӗмпе 8 пин  специалист тӑрӑшать, вӗсене валли автомобильпе инженери техникин 520 единица хатӗрлесе тӑратнӑ.

Пушара хирӗҫле режимсене Чӑваш Республикин территорийӗнче 2020-мӗш ҫултанпа кӗртеҫҫӗ. Ҫавна пула 2024 ҫулта пӗр вӑрман пушарӗн вӑтам лаптӑкӗ ПФОрипе танлаштарсан вӑтамран 58 хут сахалрах, 0,16 га танлашать. Пӗлтӗр республикӑри вӑрмансенче 60 ландшафт тата 15 вӑрман пушарӗ пулнӑ. Вӗсен пӗтӗмӗшле лаптӑкӗ 100 га яхӑн. Вӗсене пурне те пуҫланса кайнӑ хыҫҫӑн пӗрремӗш кунӗнчех сӳнтернӗ.

 «Юлашки ҫул хушшинче Чӑваш Енре ландшафт пушарӗсен шучӗ 2,6 хут чакнӑ. Кӑҫал та ҫакӑн пек кӑтартусене тытса пырсан аван. Регионта хӗлле юр сахал пулнӑ. Ҫавӑнпа та ытти ҫулхисемпе танлаштарсан пушарсем тухас хӑрушлӑх пысӑкрах.  Пушар тухма пултаракан тапхӑр маларах ҫитнӗ.  Паллӑ, лару-тӑрӑва тӗпе хурса республикӑра пушара хирӗҫле ятарлӑ режима ытти чухнехинчен маларах кӗртнӗ», – тесе палӑртнӑ Александр Куренков.

Юлашки пилӗк ҫулта хальхи вӑхӑтри 19 пушар автомобильне туяннӑ.  Пысӑк технологиллӗ хатӗрсемпе усӑ кураҫҫӗ пушарсене сӳнтернӗ чух ҫӑлавҫӑсем. 2025 ҫулта 4 пушар автоцистерни туянма палӑртнӑ.  2020-мӗш ҫултан пуҫласа 2024-мӗш ҫулччен Элӗк, Красноармейски, Хӗрлӗ Чутай, Пӑрачкав, Ҫӗрпӳ муниципаллӑ округӗсен территорийӗсенче пушар чаҫӗсен 5 уйрӑм постне туса хунӑ. Чӑваш Енре  пушара пула, пурнӑҫран вӑхӑтсӑр уйрӑлса кайнисен шучӗ 16 % чакнӑ.

«Малалла та ҫакӑн пек пӗр-пӗринпе килӗшсе ӗҫлӗпӗр. Вут-ҫулӑмпа кӗрешекенсене пулӑшассине анлӑлатӑпӑр  ӳлӗмрен те. Ҫитес виҫӗ ҫулта тепӗр 8 подразделенийӗпе 42 пушар командисем йӗркелӗпӗр, республикӑри муниципалитетсенче 7 ҫӗнӗ пушар деповӗ тӑвӑпӑр.  Пушара вӑхӑтра чармалла, ӑна алхасма памалла мар. Вут-ҫулӑмпа кӗрешесси – пирӗн пӗрлехи ӗҫ!», – тесе палӑртнӑ Чӑваш Ен Пуҫлӑхӗ Олег Николаев.