«Пурӑнма кирлӗ инфратытӑм» наци проектне пурнӑҫа кӗртессипе ӗҫлекен ведомствӗсен хушшинчи комиссийӗн ларӑвӗ иртнӗ, ӑна яланхи пекех Чӑваш Ен Пуҫлӑхӗ Олег Николаев ертсе пынӑ. Комисси членӗсем Ҫӗрпӳ тата Етӗрне хулисенче хӑтлӑх кӗртмелли проектпа смета документацине ҫирӗплетнӗ. Ҫак хуласем хӑтлӑ хула хутлӑхне йӗркелемелли проектсене хатӗрлесе Пӗтӗм Раҫҫейри IX конкурсӗн ҫӗнтерӳҫисен йышне кӗнӗ.

Проектсене пурнӑҫа кӗртмелли хак Ҫӗрпӳ хулин – 112,2 миллион тенкӗпе, Етӗрне хулинче – 135,3 миллион тенкӗпе танлашӗ. Федераци бюджетӗнчен 70,9 миллион тенкӗлӗх субсидисем пӑхса хӑварнӑ. Ытти укҫа республика тата муниципалитет бюджечӗсенчен кайӗ.

«Пурӑнма кирлӗ инфратытӑм» нацпроект шайӗнче иртнӗ Пӗтӗм Раҫҫейри конкурса хастар хутшӑнатпӑр. Кирлӗ услови – региона софинансировани тӑвасси. Сасӑлава хутшӑнакансем те ҫитӗнӳ ҫине пысӑк тӳпе хываҫҫӗ. Пилӗк ҫул хушшинче республикӑра 12 проект пурнӑҫланӑ, вӗсенчен виҫҫӗшӗ – пӗлтӗр. Конкурсра ҫӗнтерни пирӗн пӗчӗк хуласемпе истори тӑрӑхӗсене хальхи хула хутлӑхне йӗркелеме, бизнеса тата туризма аталантарма пулӑшать», – тесе  палӑртса каланӑ Олег Николаев.

Вырӑнти бизнес-сообществӑна тирпей-илем кӗртессипе, ҫав шутра коммерци пӗлтерӗшлӗ объектсем тума та, проектсене пурнӑҫлама хастартарах явӑҫтармалли пирки каланӑ Олег Николаев.  Ҫакӑ проектсене бюджет тулашӗнчи ҫӑлкуҫсенчен хушма укҫа-тенкӗ явӑҫтарма май парасса асӑннӑ.

Ҫавӑн пекех Чӑваш Ен Пуҫлӑхӗ Етӗрнере тата Ҫӗрпӳре картишсемпе шкул территорийӗсене тирпей-илем кӗртме регион регламенчӗсемпе килӗшӳллӗн ирттермеллине тата республикӑри питомниксенче ӳстернӗ ӳсен-тӑранпа анлӑ усӑ курма чӗнсе каланӑ: «Кунсӑр пуҫне пурин ҫине те пурнӑҫ ярӑмӗн контракчӗн аспектӗнче пӑхмалла: туса хурасси, эксплуатацилесси, тӗслӗх реконструкцийӗ. Объектсемпе халӑх мӗнле усӑ курнипе курманнине пирӗн чи малтан ӑнланмалла. Пӗтӗмӗшле илсен объект хӑйӗн тухӑҫлӑхне кӑтартсан, ҫакӑн пек технологисемпе ытти территорисене те тирпей-илем кӗртме усӑ курӑпӑр», – тесе сӑмаха ҫавӑрнӑ вӑл.

Комисси Пӑрачкавӑн тӗп пайне хӑтлӑх кӗртмелли концепцие те ырланӑ. Ял республикӑна «Пӑрачкав эткерӗ: салан истори центрне аталантарасси» концепципе хӑтлӑ хула хутлӑхне йӗркелемелли чи лайӑх проектсен X Пӗтӗм Раҫҫейри конкурсӗнче паллаштарӗ.

 Аса илтеретпӗр, Чӑваш Ен 2018 ҫултанпа пӗчӗк хуласемпе истори тӑрӑхӗсенче хӑтлӑ хула хутлӑхне йӗркелес енӗпе Пӗтӗм Раҫҫейри ӑмӑртӑва хастар хутшӑнать. Ҫак тапхӑрта республикӑри пӗчӗк хуласемпе истори тӑрӑхӗсен 15 заявкине ҫӗнтерӳҫӗсем тесе йышӑннӑ. Пӗтӗмӗшле илсен, иртнӗ пилӗк ҫул хушшинче Чӑваш Енре 1316 картиш тата общество хутлӑхне тирпей-илем кӗртнӗ. 2025 ҫулта – 25 проект ку енпе, 2030 ҫул тӗлне вара – 268 общество хутлӑхӗ таран тирпейлеме план тунӑ.