«Шупашкар-Арена» пӑр керменӗнче Чӑваш Ен Спорт министерствин коллегийӗн анлӑ ларӑвӗ иртнӗ, ӗҫе Чӑваш Ен Пуҫлӑхӗ  Олег Николаев хутшӑннӑ. Ларӑва хутшӑнакансем ведомствӑн 2024 ҫулхи ӗҫ пӗтӗмлетӗвӗсене, кӑҫалхи плансене тата 2030 ҫулчченхи физкультурӑпа спорт сферинчи тӗллевсене сӳтсе явнӑ.

 «Спорта аталантарасси тата спорт отраслӗнче ҫитӗнӳсем тӑвасси регионӑн социаллӑ пурнӑҫпа экономика аталанӑвӗн шанӑҫлӑ кӑтартӑвӗ пулса тӑрать. Чӑваш Республикин Правительстви социаллӑ сферӑна укҫа-тенкӗ хывнине тӑкаксем тесе мар, паянах лайӑх эффект паракан тата малашлӑх валли никӗс хывакан инвестицисем ҫумне пӑхнӑ пек пӑхса тухать. Спорта  пысӑк тӳпе хывни ҫынсен сывлӑхне ҫирӗплетме кӑна витӗм кӳмест,  вӗсен ӗҫ тухӑҫлӑхне те ӳстерме май парать. Спорта кулленех ҫӳрени, ҫитӗнекен ӑрушӑн паха. Тепӗр тесен,  чи лайӑх профилактика ӗҫӗ пулса тӑрать. Эпир хамӑр ӗҫӗн кӑтартӑвӗсене куратпӑр ӗнтӗ, вӗсене  ӳлӗмрен те вӑйлатӑпӑр», – тесе палӑртнӑ  хӑйӗн сӑмахӗнче Олег Николаев.

Юлашки пилӗк ҫулта спортпа тӑтӑшах кӑсӑкланакансен йышӗ Чӑваш Енре 14 % ытла ӳснӗ. Раҫҫей Федерацийӗн Спорт министерстви пӗлтернӗ тӑрӑх, 2024 ҫулта Чӑваш Республикинче пурӑнакан 662 пин ытла ҫын сывӑ пурнӑҫ йӗркине тытса пынӑ. Ҫак тапхӑрта Чӑваш Енре пурӑнакансене спорт объекчӗсемпе тивӗҫтерес шай 7% ытла ӳснӗ. Раҫҫей Федерацийӗн Спорт министерствин информацийӗ тӑрӑх, регион Раҫҫейре 8 вырӑн, федерацин Атӑлҫи округӗнче ҫак кӑтартупа 1-мӗш вырӑн йышӑнать.

Чӑваш Республикин Пуҫлӑхӗ Олег Николаев пулӑшнипе тата витӗм кӳнипе пилӗк ҫул хушшинче Чӑваш Енӗн спорт инфратытӑмне аталантарас енӗпе пысӑк ӗҫ туса ирттернӗ. «Атӑл» стадиона  тӗпрен юсаса ҫӗнетнӗ, хӗллехи спорт тӗсӗсен центрӗнче тата Шыв спорчӗн тӗсӗсен центрӗнче йӗлтӗрроллерпе  чупакансене валли трасса тума тытӑннӑ«, –  тесе хыпарланӑ министр.

 «Ҫак виҫӗ масштаблӑ проекта пурнӑҫа кӗртме федерацин пӗр программинче те пӑхса хӑварман малтанласа. Федераци Минспорчӗпе ытти регионсенчи спорт ведомствисен ертӳҫисем тӗлпулусенче ҫакна тӗлӗнтермӗш теҫҫӗ, 5 ҫул хушшинче пӗр региона та ҫакӑн пек федераци субсидийӗсем уйӑрнӑ тӗслӗхсене те астумаҫҫӗ. Тӗрӗссипе, тӗлӗнтермӗш кунта нимӗнле те ҫук,  ӑнсӑртран килмеҫҫӗ пулӑшусем, хамӑр тӑрӑшнине кура, Олег Алексеевич пулӑшнипе пӗрлехи командӑра пӗрне-пӗри ӑнланса ӗҫлени куҫ кӗретех», – тесе палӑртнӑ Чӑваш Республикин спорт министрӗ Василий Петров.

Чӑваш Ен Пуҫлӑхӗ пулӑшнипе  регионта республика укҫи-тенкипе те чылай спорт объекчӗсем хута каяҫҫӗ. Юлашки вӑхӑтра 4 бассейн тунӑ. Кӑҫал республикӑри футбол шкулӗ валли республикӑра пӗрремӗш витнӗ футбол манежӗ уҫӑлӗ.

Республикӑри муниципаллӑ округсемпе ялсенчи спорт сооруженийӗсем те тимлӗхсӗр юлман, унта хальхи пурнӑҫпа килӗшсе тӑракан ҫӗнӗ спортзалсем, стадионсем уҫӑлаҫҫӗ.

Патшалӑх политикин приоритечӗ – республикӑра пурӑнакан мӗнпур ҫынна сывӑ пурнӑҫ йӗркипе пурӑнма хӑнӑхтарасси. Юлашки 5 ҫулта спорт тата 116,5 пин ҫыншӑн пурнӑҫ норми пулса тӑнӑ. Ҫакна тума уйӑхсерен сывлӑхпа спорт кунӗсем ирттерни пулӑшнӑ. Иртнӗ ҫул кӑна 700 пине яхӑн ҫын спорт объекчӗсене тӳлевсӗр ҫитсе  хӑйсен сывлӑхне ҫирӗплетнӗ. Ҫав вӑхӑтрах юлашки пиллӗк ҫулта аслӑ ӳсӗмри ҫынсен,  кулленех спорт кӑмӑллакансен, шучӗ 2,5 хут ӳснӗ.

 Пилӗк ҫул хушшинче Чӑваш Республики Пӗтӗм Раҫҫейри рейтингра ГТО комплексне пурнӑҫа кӗртессипе мӗнпур регион хушшинче 2019 ҫулта 25-мӗш вырӑнтан, 2024 ҫулта 6-мӗш вырӑна хӑпарнӑ. Федерацин Атӑлҫи округӗнчи регионсен хушшинче вара Чӑваш Ен 1-мӗш вырӑн йышӑнать.