Евгений Александров гварди сержант вӑхӑтсӑр пирӗнтен уйрӑлса кайнӑ, ӑна Раҫҫей Федерацийӗн Геройӗ ятне панӑ. Торжествӑлла пулӑмра Ҫӗрпӳре пурӑнакан унӑн  ашшӗ-амӑшне медале парса хисеп тунӑ.

 «Ылтӑн ҫӑлтӑр» медале тата Раҫҫей Федерацийӗн Президенчӗн Хисеп хутне паттӑрӑн ашшӗ-амӑшне — Сергей Николаевичпа Алина Николаевнӑна — Сергей Чубарыкин генерал-майор тата Чӑваш Республикин Пуҫлӑхӗ Олег Николаев  парса чысланӑ.

Мероприятие Чӑваш Республикин ҫар комиссарӗн тивӗҫӗсене вӑхӑтлӑх пурнӑҫлакан Сергей Сергеев хутшӑннӑ.

 «Паян эпир Тӑван ҫӗршыва хӳтӗленӗ Евгение, паттӑра, асӑнса чыслама пухӑнтӑмӑр. Унӑн ашшӗ-амӑшне «Ылтӑн ҫӑлтӑр» тыттарнӑ май, вӗсене хисеплесе тав сӑмахӗ калатӑп. Сергей Николаевич, Алина Николаевна, ывӑлӑра питӗ тӗрӗс воспитани парса ҫитӗнтернӗ. Эсир Тӑван ҫӗршыва юратма вӗрентнӗ хӑвӑрӑн ывӑлӑра.  Евгений Тӑван ҫӗршыва юратнӑ, ҫӗршывӑмӑрӑн пуласлӑхӗшӗн хӑйне шеллемесӗр ӗҫлеме хатӗр пулнӑ. Вӑл пирӗн чӗресенче ӗмӗрлӗхе юлӗ, унӑн паттӑрла ӗҫӗсене аса тытӑпӑр. Евгений ячӗ ӗмӗрлӗхех пулӗ: ҫывӑх вӑхӑтрах ӑна хисеплесе шкулпа урам ятне парӑпӑр. Ҫак ҫӑлтӑр, вӑхӑтсӑр сӳннӗскер, пирӗн чӗресенче яланлӑхах ялкӑшса тӑрӗ», — тенӗ Чӑваш Ен Пуҫлӑхӗ Олег Николаев.

Ҫӗрпӳре  ҫуралса ӳснӗ Евгений Сергеевич Александров ҫамрӑклах спортпа туслӑ пулнӑ, поэзипе тата ҫар ӗҫӗпе кӑсӑкланнӑ. 2018 ҫулта ҫар ретне тӑнӑ.  Унта вӑл командир пулса, ыттисемшӗн чӑн-чӑн тӗслӗх пулса тӑнӑ.  Хӑйне шанса панӑ ӗҫсене ялланах яваплӑха туйса пурнӑҫланӑ. Ятарлӑ ҫар операцине хутшӑннӑ, унта та чылай паттӑрла ӗҫсем туса, пысӑк наградӑсене тивӗҫлӗ пулнӑ.  Кун пирки ҫирӗппӗн каланӑ СВОра пӗрле пулнисем.

 «Пирӗншӗн чӑтмалла мар пысӑк хуйхӑ. Эпир хамӑрӑн ывӑлпа вӑхӑтсӑр сывпулашатпӑр. Паян эпир сирӗн умӑрта хуйхӑпа, мӑнаҫлӑхпа тулнӑ йывӑр чӗрепе тӑратпӑр. Пирӗн ывӑл Евгений Тӑван ҫӗршывшӑн ӗҫлеме хӑй ҫул-йӗрне хӑех суйласа илчӗ. Вӑл ҫӗршыва хӳтӗлеме ӗмӗтленчӗ. Унӑн ӗмӗчӗ унӑн пурӑнӑҫӗн чӑн-чӑн хакӗ пулса тӑчӗ. Тавах сире пулӑшнӑшӑн тата ӑна асра тытнӑшӑн. Унӑн паттӑрлӑхӗ пире ырӑ ӗҫсем тума хавхалантартӑр», - тесе каланӑ  Раҫҫей Геройӗн Евгений Александровӑн ашшӗ Сергей Александров. 

Раҫҫей Федерацийӗн Геройӗн Евгений Сергеевич Александров гварди сержантӑн ятне Аслӑ Раҫҫей историне ӗмӗрлӗхех ҫырса хунӑ, ӑна асра тытни ӗмӗрлӗхех пирӗн чӗресенче юлӗ.