Чӑваш Енӗн тӗп хулинче сӑра вӗретекен культурӑна тата хӑмла ӗрчетес ӗҫе аталантарассине халалланӑ Пӗтӗм Раҫҫейри «Раҫҫейӗн симӗс ылтӑнӗ» фестиваль тӑваттӑмӗш хут старт илнӗ. Ӑна  йӗркелесе ирттерме Раҫҫей Федерацийӗн Ял хуҫалӑх министерстви витӗм кӳрет. Кӑҫал ҫак анлӑ пулӑм Белоруссирен хутшӑнакансене йышӑнса тӗнче шайӗнчи статуса тивӗҫрӗ.

 «Пӗтӗм Раҫҫейри фестивале  пухӑннисене  чунтан саламлатӑп.  Паллӑ пулӑм хӑмла туса илессипе ҫыхӑннӑ мӗнпур япалана яр уҫҫӑн сӑнарлать. Кунта пирӗн хӑмла-салат, пыл-сӑра туса илекенсен  таварӗсем пур. Форум шайӗнче пирӗн тӗллев – ӗҫсен хальхи лару-тӑрӑвне тата пурнӑҫа пӗрле кӗртмелли малашнехи плансене сӳтсе явасси. Ҫак мероприятинче вӑхӑта питӗ лайӑх  кӑмӑл-туйӑмпа ирттерме, ҫӗнӗ туссем тупма, малалла та пысӑк ҫитӗнӳсем патне ӑнтӑлма сунатӑп», –  тесе каланӑ  хӑйӗн сӑмахӗнче уява пухӑннисене саламланӑ май Чӑваш Ен Пуҫлӑхӗ Олег Николаев.

Фестиваль – хӑмла туса илекенсем хушшинчи ӗҫлӗ ҫыхӑнусене сӳтсе явма, пӗрлехи тӗллевсене пӑхса тухма,  пӗр-пӗрин паха ӗҫ опычӗсемпе паллашма май парать. Мероприяти регион бренчӗсене  анлӑрах сарма,  ял хуҫалӑхне аталантарма инвестицисем явӑҫтарма витӗм кӳрет.

Вырӑнти тата регионти сӑра тӑвакансем, ҫавӑн пекех Белоруссирен  килнӗ хӑнасем хӑйсен таварӗсемпе паллаштарнӑ. Вӗсен йышӗнче:   «Букет Чувашии» ОАО, «БУЛГАРПИВО» ОАО, «Визит» АО, «Золотой хмель» ООО, «Пивоваренная компания НАШЕ ПИВО» ООО, крафтовая пивоварня «Дворф», Волковская пивоварня, компания «Медостав24» тата  харпӑр хӑй тӗллӗн ӗҫлекен «Zlata Podkova».

Хӑнасем чи лайӑх сӑрасене тутанса пӑхма пултарнӑ.  Пӗтӗмпе фестиваль ӗҫне 21 сӑра завочӗ, обществӑлла апатлану 25 предприятийӗ тата пӗчӗк калӑпӑшлӑ хуҫалӑхсен 7 предприятийӗ, ҫавӑн пекех халӑх промыслисен 6 представителӗ хутшӑнӗ.

Утӑ уйӑхӗн 17-18-мӗшӗсенче Пӗтӗм Раҫҫейри «Раҫҫей хӑмли -2025» конференци иртет. Хӑмла, салат тата хӑмла ӗрчетес ӗҫпе ҫыхӑннӑ тӗрлӗ ыйтусене сӳтсе явӗҫ,  пуласлӑх валли  тӗллевсене палӑртӗҫ.

Чӑваш Ен хӑмла туса илессипе Раҫҫейри малта пыракан регионсенчен пӗри шутланать. Паян  та республика хӑмла лартса ҫитӗнтерессипе  хастар ӗҫлет, хальхи технологисене пӑхӑнса паха таварсем тирпейлесе кӑларма тӑрӑшать.

Чӑваш Республикин Правительстви хӑмла ӗрчетес ӗҫе аталантарасси ҫине пысӑк тимлӗх уйӑрать, отрасле пур енлӗн пулӑшу парать. Регионта пулӑшу памалли ятарлӑ мерӑсем ӗҫлеҫҫӗ, ҫав шутра тӑкаксене саплаштарма та витӗм кӳрет.

Республикӑн социаллӑ пурнӑҫпа экономика аталанӑвӗн программи шайӗнче Чӑваш Ен Пуҫлӑхӗ Олег Николаев пулӑшнипе «Чӑваш хӑмли» ҫӗнӗ грант хута каять. Хӑмла ӗрчетессине аталантарма грант пулӑшӑвӗ панӑ май 2025 ҫултан пуҫласа 2030 ҫулччен федераци бюджетӗнчен 1,8 млрд тенкӗ, бюджетран кӗмен ҫӑлкуҫсенчен 2,2 млрд тенкӗ уйӑрма пӑхса хӑварнӑ. Ҫак укҫа-тенке конкурсра мала тухнисене Раҫҫей организацийӗсемпе уйрӑм предпринимательсене парӗҫ. Ҫав вӑхӑтрах бюджет тулашӗнчи ҫӑлкуҫсенчен инвестицисем производствӑпа хӑмла тирпейлессине йӗркелеме, техникӑпа оборудовани паркне ҫӗнетсе улӑштарма тӑкаклӗҫ.

 Хӑмла лартса ҫитӗнтерес ӗҫе вӑйлатса  2030 ҫул тӗлне 2 пин тонна таран тавар тирпейлесе кӑларма  тӗллев лартнӑ.  Импорта куҫарас ыйту та кун йӗркинчех тӑнине каланӑ  Чӑваш Ен Пуҫлӑхӗ.

Палӑртса хӑваратпӑр, виҫҫӗмӗш ҫул ӗнтӗ фестивале йӗркелесе ирттерес ӗҫе «Россельхозбанк» пулӑшать.

«Чӑвашсен авалхи хӑмла ӗрчетес тата сӑра вӗретес йӑли-йӗркине упраса хӑварма пулӑшнипе эпир мӑнаҫланатпӑр.  Банк Чӑваш Ен Правительствипе тачӑ ҫыхӑнса ӗҫлет. Чӑваш Ен  Пуҫлӑхӗ Олег Алексеевич аграри сферине пысӑк тимлӗх уйӑрать», – тесе уйрӑммӑн палӑртса каланӑ  Россельхозбанкӑн Чӑваш Ен филиалӗн директорӗ Ирина Письменская.