Канаш хулине 100 ҫул ҫитнине палӑртса курӑмлӑ пысӑк мероприятисем пулса иртнӗ. Паллӑ пулӑма палӑртма Чӑваш Ен Пуҫлӑхӗ Олег Николаев хутшӑннӑ. Республика Пуҫлӑхӗ  хулара пурӑнакансене саламласа унӑн аталанӑвне чи пысӑк тӳпе хывнисене наградӑсем парса хавхалантарнӑ.

Хӑйӗн ҫӗрмӗш ҫуралнӑ кунне Канаш  питӗ савӑнӑҫлӑ уявланӑ.  Унта пурӑнакансемпе хӑнасем, республика  ертӳлӗхӗ валли уяв программи питӗ кӑсӑклӑ та паха пулнӑ.

Ҫамрӑксем аквагрима хутшӑннӑ, хӑйсен ӑсталӑхне кӑтартнӑ.  Ача-пӑча авточупӑвӗн маршрутӗнче  хӑйсен вӑй-халне тӗрӗсленӗ. Аслисене валли ӳнер тӗсӗн формачӗсемпе жанрӗсене тӗрлӗ енлӗн кӑтартнӑ.

Пултарулӑха юратакансем валли ятарлӑ Пултарулӑх проспекчӗ уҫӑлнӑ. Кунта кашниех йӑлана кӗнӗ чӑваш сувенирӗсемпе паллашма пултарнӑ, ӑсталаса пӑхнӑ. Паха таварсене туяннӑ.

Авалхи рецептсемпе хатӗрленӗ наци чӑваш апат-ҫимӗҫне ҫисе пӑхнӑ хӑнасем. Канаш поварӗсем ятарласа Хула кунӗ тӗлне 100 юбилей кукӑлӗ пӗҫернӗ. Уяв атмосферине фольклор коллективӗсем пуянлатнӑ. Унтах, Пултарулӑх проспектӗнче, канаш предприятийӗсен таварӗсен куравӗ  пулнӑ.

Спортӑн тӗрлӗ тӗсӗпе: мини-футболпа, волейболпа, сӗтелҫи теннисӗпе, шахматпа шашкӑпа, ҫавӑн пекех спорт кӗрешӗвӗ енӗпе ӑмӑртусем иртнӗ.

Каҫхине вара пин-пин хула ҫыннипе Канаш хӑнисем, предприятисен ӗҫченӗсем  хулан тӗп уявне пухӑннӑ.

Мероприяти уяв концерчӗпе вӗҫленнӗ. Чӑваш Енри чи лайӑх пултарулӑх коллективӗсемпе вокалистсем тата Раҫҫейри паллӑ артистсем  хаваслӑ юрӑ-кӗвӗ парнеленӗ.