Нацпроектсене пурнӑҫлама 2025 ҫулта Чӑваш Енре 15 млрд ытла тенкӗ уйӑрнӑ. Кун пирки Олег Николаева стратегилле аталану тата проект ӗҫӗ-хӗлӗ енӗпе ӗҫлекен Чӑваш Республикин Пуҫлӑхӗ ҫумӗнчи канаш ларӑвӗнче каланӑ.

Паянхи кун Чӑваш Ен 12 наци проектне пурнӑҫа кӗртме хутшӑнать. Вӗсен тӗллевӗсене пурнӑҫламашкӑн республика 41 регион проектне хатӗрлесе хута янӑ.

 «Уйӑрнӑ 15,3 миллиард тенкӗрен 3,4 миллиард тенкине 40 объекта тума тата реконструкцилеме ярӗҫ. Ҫав вӑхӑтрах вӗсенчен 14-шне кӑҫалах хута яма палӑртнӑ. Бюджет укҫин 98 проценчӗн йӗркине тӑватӑ нацпроекта пурнӑҫлама  тӑкаклӗҫ. Халӑхӑн пурӑнас ҫулӗсене тӑсасси, ачасемпе ҫамрӑксене тимлӗх уйӑрасси те приоритетлӑ», – тесе  палӑртнӑ Чӑваш Енӗн Министрсен Кабинечӗн Председателӗн ҫумӗ Дмитрий Краснов.

Раҫҫей Правительствин проект офисӗ хакланӑ тӑрӑх республика нацпроектсен тӗллевлӗ кӑтартӑвӗсене пурнӑҫланин шайӗпе ҫӗршыври регионсен хушшинче лидерсен шутне кӗрет. Кӑҫалхи иккӗмӗш кварталта Чӑваш Ен позицисене лайӑхлатнӑ, ҫӗршывӗпе 4-мӗш вырӑн йышӑннӑ. 12 нацпроектран 10-шар енӗпе республика ҫӗр процентлӑ кӑтартусем тунӑ.

Республикӑра пурӑнакансен 95% нацпроектсен шайӗнче йӗркелекен объектсемпе  кӑмӑллӑ пулни куҫ кӗретех. Ку вӑл Раҫҫей вӑтам шайӗнчен чылай ҫӳллӗрех (83%). Ҫакӑн пек даннӑйсене «Наци приоритечӗсем» АНО илсе кӑтартать. Ҫак кӑтартупа Чӑваш Ен Раҫҫейӗпе 2-мӗш вырӑн йышӑнать.

Стратеги канашӗн ларӑвӗнче пурӑнмалли ҫурт-йӗр тӑвас, ЖКХ тата инфраструктура аталанӑвӗн сферинче наци тата регион проекчӗсене мӗнле пурнӑҫланине пӑхса тухнӑ. Строительство, архитектура тата пурӑнмалли ҫурт-йӗрпе коммуналлӑ хуҫалӑх министрӗ Владимир Максимов пӗлтернӗ тӑрӑх, 2025 ҫултанпа Чӑваш Ен пурнӑҫланмалли ҫӗнӗ нацпроекта пурнӑҫлама тытӑннӑ, вӑл шутне тӑватӑ федераци проекчӗ кӗрет: «Ҫурт-йӗр», «Коммуналлӑ инфраструктурӑна ҫӗнетесси», «Хӑтлӑ хула хутлӑхӗ» тата «Халӑх йышлӑ пурӑнакан вырӑнсенче инфраструктура аталанни».

 «Коммуналлӑ инфраструктурӑна модернизацилесси» федераллӑ проект шайӗнче кӑҫалхи ҫул пилӗк объекта пурнӑҫлама пуҫлассине пӑхса хӑварнӑ. Вӗсен шутӗнче: Ҫӗрпӳ хулин шывпа тивӗҫтермелли системисене реконструкцилесси, Патӑрьел, Шӑмӑршӑ тата Комсомольски округӗсен объекчӗсен 1 тапхӑрне тӑвасси тата ытти те.

 «Хальхи хула хутлӑхне йӗркелесси» федераци проекчӗ шайӗнче кӑҫал хӑтлӑх кӳрекен ҫӗнӗ объектсемшӗн Пӗтӗм Раҫҫейри сасӑлавра ҫӗнтернӗ 25 обществӑлла уҫлӑха тирпей-илем кӗртме палӑртнӑ. 12 территорире ӗҫсене вӗҫленӗ. Унсӑр пуҫне Ҫӗрпӳпе Етӗрнере пӗчӗк хуласемпе истори тӑрӑхӗсенче хӑтлӑ хула хутлӑхне йӗркелемелли чи лайӑх проектсен Пӗтӗм Раҫҫейри IX конкурсӗн ҫӗнтерӳҫисен проекчӗсене пурнӑҫлама тытӑннӑ.

Чӑваш Ен Пуҫлӑхӗ Олег Николаев партнерсемпе тата подрядчиксемпе ӗҫлекен ӗҫре клиентоцентричность ӑнлав пысӑк пӗлтерӗшлӗ пулмаллине каланӑ.

 «Масштаблӑ тӗллевсене татса пама чӑнах та кӑткӑс. Пирӗн тӗллев – подрядчиксем хӑвӑртрах ӗҫлеме пултарччӑр тесе майсем туса парса тухӑҫлӑ хутшӑну йӗркелесси, ҫав хушӑрах тӗрӗслев системине аталантарса пырасси. Ҫапла ӗҫлесен Чӑваш Енре пурӑнакансен пурнӑҫ условийӗсен шайне лайӑхлатма пулать», – тесе  сӑмаха ҫавӑрнӑ республика Пуҫлӑхӗ.