Паян Правительство ҫуртӗнче Чӑваш Республикин Министрсен Кабинечӗн Председателӗн тивӗҫӗсене пурнӑҫлакан Сергей Артамонов эрнесерен пулакан планеркӑна ирттернӗ. Кун йӗркинчи тӗп ыйтусенчен пӗри – ватӑ ҫынсене кирлӗ пек пулӑшусемпе тивӗҫтересси.

Ӗҫпе социаллӑ хӳтлӗх министрӗн тивӗҫӗсене пурнӑҫлакан Алёна Елизарова Чӑваш Республикинче ӗҫлеме пултаракан ӳсӗмрен 284 пине яхӑн граждан пурӑннине палӑртнӑ – ку халӑхӑн тӑваттӑмӗш пайӗ темелле. Вӗсен хушшинче 5737 ҫын хӑйӗн тӑххӑрмӗш теҫеткине паллӑ тунӑ та ӗнтӗ, регионта пирӗн 90 ентеш 100 ҫулхи юбилейне уявланӑ.

«Эпир пысӑк тӗллев лартатпӑр: 2030 ҫул тӗлне пурнӑҫӑн вӑтам тӑршшӗне 77 ҫул ытла шайӗнче тивӗҫтермелле. Аслӑ ӑрӑвӑн паха опычӗ ялан тӗслӗхре. Тивӗҫлӗ ватлӑхпа тивӗҫтересси, ватӑ ҫынсене общество пурнӑҫне явӑҫтарасси тата вӗсен сывлӑхне упраса хӑварасси регионӑн социаллӑ политикин тӗп приоритечӗсем шутланаҫҫӗ.

Аслӑ ӑру гражданӗсен интересӗсемшӗн йышӑннӑ Стратегийӗ 2030 ҫулччен комплекслӑ пулӑшупа тивӗҫтерет: доброволецсен программисене аталантарнинчен пуҫласа цифра тата финанс грамотине вӗрентесси таранах. 5 ҫул хушшинче 13 центр хута янӑ. «Манӑн социаллӑ центр» (вӗсем 16 пине яхӑн ватӑ ҫынна пулӑшу кӳреҫҫӗ) – ку чӑн-чӑн пысӑк тӗрев пулса тӑрать», – тесе пӗлтернӗ хӑйӗн телеграм-каналӗнче Чӑваш Ен Пуҫлӑхӗ Олег Николаев.

Пирӗн регионти вӑтам пурнӑҫ тӑршшӗ 73 ҫула ҫитрӗ, ку 2020 ҫулхи кӑтартуран 2 ҫул пысӑкрах. Патшалӑх пуҫарӑвӗсемпе программисем тухӑҫлӑ пулнине ҫирӗплетет ку кӑтарту. Паян республикӑра тӗрлӗ социаллӑ мерӑсем пур, вӗсем граждансене пулӑшу кӳрессипе комплекслӑ майпа тивӗҫтереҫҫӗ.

Пӗтӗм тӗнчери ватӑ ҫынсен куннӗ ҫывхарса килет, ӑна халалласа Чӑваш Енре 400 ытла мероприяти ирттерме палӑртнӑ, унта 30 пине яхӑн ватӑ граждан хутшӑнӗ.

«Пирӗн ватӑ граждансем – ӑслӑ, паха опытлӑ ҫынсем. Вӗсене пирӗн ӗмӗрех хисеплесе пурӑнмалла. Эпир аслӑ ӑрӑва хӑтлӑ та тулли пурнӑҫпа пурӑнма мӗн кирлине пурне те тума тивӗҫ, вӗсене тивӗҫлӗ ватлӑхпа тивӗҫтеретпӗр», – тесе сӑмаха ҫавӑрнӑ Алёна Елизарова.