Чӑваш Енре «Чӑваш Республики – аталану уҫлӑхӗ» Республикӑри ашшӗ-амӑшӗн форумӗ иртнӗ. 2019 ҫултанпа вӑл чи лайӑх практикӑсене тишкерсе, пӗр-пӗрин паха ӗҫ  опычӗпе паллашмалли вырӑн пулса тӑнӑ.

Кӑҫал ачасен пуласлӑхӗ, ҫитӗнекен ӑрӑва вӗрентӳпе воспитани парас ӗҫре хальхи вӑхӑтри чӗнӳсем ҫинчен калакан уҫӑ  калаҫӑва Республикӑри ашшӗ-амӑшӗн комитечӗпе тата муниципалитет округӗсемпе паллаштаракан 230 яхӑн хастар ашшӗ-амӑшӗ пуҫтарӑннӑ.

Чӑваш Республикин Патшалӑх Канашне янӑ Ҫырура Олег Николаев вӗрентӳ процесӗнче ашшӗ-амӑшӗсен комитечӗсем питӗ пысӑк вырӑн йышӑннине палӑртнӑ: «Эпир ашшӗ-амӑшӗсен пӗрлӗхӗ шкул пурнӑҫне хастар хутшӑннине пӗлетпӗр. Ку хутшӑну та тӗрлӗ енлӗ пулмалла, сӑмахран, апатлану пахалӑхне тӗрӗслесе тӑрасси, ачасен хастарлӑхне тӗрлӗ енлӗ йӗркелесси тата ытти те. Чӑваш Енре вӗрентӳ системине пӗрле тӑрӑшса ӗҫлесен тата лайӑхрах тума пултарайратпӑр», – тенӗ.

Мероприяти шайӗнче Раҫҫей обществин «Знание» конкурсӗнче ҫӗнтерӳҫӗсем пулса тӑнӑ ашшӗ-амӑшӗсен пӗрлӗхӗсен пуҫарӑвӗсен курав-презентацийӗ пуднӑ.

Форумра экспертсем хутшӑннипе 9 тӗрлӗ уҫӑ калаҫу ирттернӗ. Республикӑри ашшӗ-амӑшӗсен комитечӗн комиссийӗн пайташӗсем ашшӗсен ачасене воспитани парассинче пӗлтерӗшӗ пысӑк тесе хакланӑ. Тухӑҫлӑ хутшӑну хӑнӑхӑвӗсене аталантарасси, вӗрентӳ пахалӑхне пӗрле тӗрӗслесе тӑма майсем туса парасси, спортпа туслашма тата пысӑк кӑтартусем тума хавхалантарасси, пултаруллӑ ачасен вӑй-хӑватне уҫса парасси, вӗрентӳ учрежденийӗсемпе ҫемьесем хушшинчи ӗҫтешлӗхе ҫирӗплетесси, кашни ачан прависене хӳтӗлесси ыйтусем приоритетлӑ пулнине асӑннӑ.

Форум ӗҫӗнчи ҫӗнӗлӗх – ҫитес ҫул хута яма палӑртнӑ «Ашшӗ-амӑш патрульӗ» проект. Ӑна ҫул-йӗр хӑрушсӑрлӑхне тивӗҫтерме тата ҫул-йӗр ҫинчи ачасене хӳтӗлес тӗллевпе  палӑртнӑ. Патруль ҫуран ҫӳремелли хӑрушӑ вырӑнсене тӗрӗслесе тӑрӗ тата республикӑри ҫамрӑк ҫынсене ҫулсем ҫинче хӑрушсӑрлӑх правилисене пӑхӑнма вӗрентӗ.

Ашшӗ-амӑшӗн комитечӗн ӗҫ планне тепӗр ҫул ачасене пулӑшма тата ашшӗ-амӑшӗн пӗрлӗхне аталантарма пулӑшакан анлӑ мероприятисем кӗртме палӑртса хунӑ.