Çӗнтерӳ тунӑранпа 81 ҫул ҫитнине палӑртса Чӑваш Енӗн тӗп хулинче Тӑван ҫӗршыв хӳтӗлевҫисене асӑнса  республика Пуҫлӑхӗ Олег Николаев Мухтав Монуменчӗ умне чечексем хунӑ. Раҫҫейри пур ҫыншӑн та сумлӑ, пысӑк пӗлтерӗшлӗ уяв пулса тӑракан Ҫӗнтерӳ кунӗ Чӑваш Еншӗн тулашри хӑрушлӑхсен условийӗсенче фронтпа тыл пӗрлӗхне палӑртакан символ пулса тӑчӗ.

 «Пирӗн асаттесем тӑшман алӑк умне ҫитсен те чӑтса ирттернӗ. Эпир паян та чакмастпӑр. Эпир иртнине асра тытатпӑр, паянхи кунра ҫирӗп тӑратпӑр, хамӑрӑн пуласлӑха хӳтӗлеме пурне те тӑвӑпӑр. Пирӗн салтаксем малти линире. Эпир кунта, тылра, нихҫанхинчен те пӗрлӗхре пулса тӑтӑмӑр. Тӑшман пирӗн мирлӗ Чӑваш Ене, ҫемьесене тапӑнчӗ. Анчах республика чӑтса ирттерчӗ: ҫынсем пӗр-пӗрне пулӑшаҫҫӗ, тӗрлӗ службӑсем килӗштерсе ӗҫлеҫҫӗ. Чӑваш Ене никам та парӑнтараймӗ. Шӑпах та, ҫакӑн пек ҫирӗплӗх, паттӑрлӑх 1945-мӗш ҫулта пирӗн халӑха Ҫитӗнӳ патне илсе ҫитерчӗ, халӗ те илсе ҫитерет», - тесе палӑртса каланӑ Пуҫлӑх хӑйӗн ум сӑмахӗнче.

Республикӑн Пуҫлӑхӗпе пӗрле Аслӑ Отечественнӑй вӑрҫӑ геройӗсене хисеп туса тата чысласа Раҫҫей Федерацийӗн Патшалӑх Думи депутачӗсем Анатолий Аксаковпа Алла Салаева, регионти Министрсен Кабинечӗн членӗсем, Чӑваш Республикин Патшалӑх Канашӗн депутачӗсем хутшӑннӑ. Церемоние Общество палатин членӗсем, федераллӑ ведомствӑсен ертӳҫисем, вӑрҫӑ ветеранӗсем, ятарлӑ ҫар операцийӗн участникӗсем тата наципе культура пӗрлешӗвӗсен представителӗсем  килсе ҫитнӗ. Пӗр сӑмахпа каласан,  общество организацийӗсен, хула администрацийӗн представителӗсем тата республикӑра пурӑнакансем  чылайӑн пухӑннӑ.