Санкт-Петербургра Чӑваш Ен кунӗсем уҫӑлнӑ. Республика Пуҫлӑхӗ Олег Николаев Александринский театрӗн президенчӗпе, Раҫҫейри наци театрӗсен Ассоциацийӗн Канашӗн председателӗпе Валерий Фокинпа тӗл пулнӑ.

Икӗ ен наци театрӗсен виҫҫӗмӗш конгресне Шупашкарта 2027 ҫулта ирттерессипе малашне килӗштерсе ӗҫлессине сӳтсе явнӑ. Ӑна СССР халӑх артистки Вера Кузьмина ячӗллӗ наци театрӗсен Пӗтӗм тӗнчери фестивалӗ шайӗнче йӗркелеме палӑртнӑ. Асӑннӑ фестиваль Чӑваш Енре пӗрремӗш хут 2023 ҫулхи чӳк уйӑхӗнче иртнӗ, вӑл регионӑн культура пурнӑҫӗн уйрӑлми пайӗ пулса тӑнӑ.

Чӑваш Ен наци театр юхӑмне тахҫанах хастар хутшӑннине, пӗтӗм Раҫҫейри анлӑ мероприятие хӑй патӗнче йышӑнма хатӗррине палӑртнӑ республика Пуҫлӑхӗ. «Пирӗн легендарлӑ актриса Вера Кузьмина ячӗллӗ «Чӗкеҫ» виҫҫӗмӗш фестиваль шайӗнче наци театрӗсен Конгресне ирттерни Чӑваш Енӗн театр пурнӑҫне аталантармалли хӑватлӑ импульс парса тӑрӗ. Ҫакӑ фестивале ҫӗнӗ шая илсе тухса ӑна ҫутӑ вӗренӳ тытӑмне пуянлатӗ кӑна мар, театр искусствине те пирӗн ҫынсене питӗ пысӑк тимлӗх уйӑрӗ. Хамӑр енчен эпир пур мероприятие те чи ҫӳллӗ шайра ирттерме  яваплӑха хамӑр ҫине илетпӗр», – палӑртнӑ сӑмаха малалла тӑснӑ май, Чӑваш Ен Пуҫлӑхӗ Олег Николаев.

Александринский театрӗн президенчӗ, Ассоциаци Канашӗн председателӗ Валерий Фокин ҫак йышӑнусем республика имиджне федераци шайӗнче ҫирӗплетессе шаннине палӑртнӑ. «Чӑваш Енре пулакан фестиваль 2027 ҫулта ирттерме палӑртнӑ наци театрӗсен конгресӗ чи кирлӗ ыйтусене сӳтсе явма сцена лидерӗсене пухӗ. Театр эстетикин ыйтӑвӗ кӑна мар вӗт вӑл – пирӗн пысӑк, тӗрлӗ енлӗ ҫӗршывра патшалӑх культурипе ҫыхӑнӑвӗсен ыйтӑвӗ», – тенӗ Валерий Фокин. Вӑл ҫавӑн пекех Пӗтӗм тӗнчери театр олимпиадинче Чӑваш Ене паллаштарас пуҫарупа мала тухнӑ, ҫакӑ республикӑри пӗтӗм тӗнчери престижа ҫирӗплетес ӗҫре пӗлтерӗшлӗ утӑм пулса тӑнине те асӑннӑ.

Конгреса хатӗрленнисӗр пуҫне Александринский театрӗн гастролӗсене республикӑра йӗркелеме май пуррине сӳтсе явнӑ. Унсӑр пуҫне Чӑваш Енри театр пӗрлӗхӗ Петербургри специалистсен профильлӗ мастер-класӗсенче тата республикӑри патшалӑх театрӗсен пултарулӑх тата техника ӗҫченӗсем валли программӑсем хатӗрленӗ ҫӗрте кӑсӑкланнӑ. Александринский театрӗн вӗренӳ программисемпе усӑ курасси пирки килӗшӳ туни наци драматургине аталантарма, ҫак сферӑра ҫӗнӗ ятсем уҫма май парассине  асӑннӑ сӑмаха ҫавӑрнӑ май Чӑваш Ен Пуҫлӑхӗ Олег Николаев.