Пӗлӳ кунӗ. Правительство ҫуртӗнчи эрнесерен ирттерекен планеркӑра республикӑри вӗренӳ заведенийӗсем ҫӗнӗ вӗренӳ ҫулне мӗнле хатӗррине сӳтсе явнӑ. Чӑваш Енӗн Вӗренӳ министерстви пӗлтернӗ тӑрӑх, партӑсем хушшине 275 пин ытла вӗренекенпе студентсем ларӗҫ.

Кӑҫал пӗрремӗш шӑнкӑрав 11,4 пин ачашӑн янӑрӗ.  64-мӗш №-лӗ шкул пӗрремӗш класра вӗренекен 500-е яхӑн ача йышӑнӗ, 44-мӗш №-лӗ лицей – 400 ытла ача йышӑнӗ, 65-мӗш №-лӗ шкулта 11 пӗрремӗш  класс уҫӑлӗ, 2-мӗш номерлӗ пуҫламӑш шкулта тата 2-мӗш гимназире – 10.

 «СВОна хутшӑнакансен Ассоциацийӗ пуҫарнипе уяв линейкисене ятарлӑ ҫар операцине хутшӑннӑ ветерансем ертсе пырӗҫ. Ку питӗ пӗлтерӗшлӗ йышӑну. Ачасем ҫак уйрӑм кун хӑйсене пӗччен туймалла мар. Вӗренӳ ҫулӗ пуҫланнӑ май ачасене мӗн кирлине пурне те тумалла, вӗсемшӗн чӑн-чӑн уяв пулса тӑмалла», – тесе палӑртса каланӑ Чӑваш Республикин Пуҫлӑхӗ Олег Николаев.

Вӗренӳ организацийӗсенчен чылайӑшӗ  ҫирӗп тӗрӗслев витӗр тухма та ӗлкӗрнӗ.  Халӗ  тӗпрен юсав ӗҫӗсем  хӑш-пӗр шкулсенче пыраҫҫӗ. Ҫав вӑхӑтрах вӗсенчен 18-шӗнче  ҫывӑх вӑхӑтсенче строительство ӗҫӗсем  пӗтӗҫ. Графикпа килӗшӳллӗн, вӗсене ноябрь уйӑхӗнче пӗтӗмпех йӗркелесе ҫитерме палӑртнӑ.

Комплекслӑ хӑрушсӑрлӑха уйрӑмах пысӑк тимлӗх уйӑрнӑ. Объектсене сыхлассине лицензиленӗ уйрӑм хурал предприятийӗсем тивӗҫтерӗҫ. Шкул ҫурчӗсене видеокамерасемпе, сигнализаципе туллин тивӗҫтернӗ.

Специалистсем ҫавӑн пекех шкул транспорчӗсене тӗрӗсленӗ. 400 ытла автобус вӗренме кунсерен 13,5 пин ачана турттарӗ. Кӑҫал парка 40 ҫӗнӗ шкул автобусӗпе пуянлатнӑ.

Олег Николаев хушнипе Чӑваш Енре пур шкула та  ачасене апатлантарма хӑтлӑ условисем йӗркеленӗ.  Пуҫламӑш классенче вӗренекен 55 пин ача валли тӳлевсӗр вӗри апат хатӗрлеме федераци бюджетӗнчен 780 млн тенкӗ ытла пӑхса хӑварнӑ.  200 млн тенкӗ ытла республика СВОна хутшӑнакансен ачисем валли, нумай ачаллӑ сахал тупӑшлӑ ҫемьесенчи шкул ачисене апатланма уйӑрса панӑ.

Авӑн уйӑхӗн  1-мӗшӗ тӗлне кӗнеке фондне ҫӗнетнӗ. Шкулти библиотекӑсем валли 500 пин кӗнеке 394 млн тенкӗлӗх туяннӑ. Вӗрентекен программӑна «Пирӗн ентешӗн историйӗ. Чӑваш Ен» ҫӗнӗ таврапӗлӳ курсӗ те кӗнӗ, 2027 ҫул тӗлне кашни вӗренекене пособисемпе тивӗҫтерме плана кӗртнӗ.

Тата тепӗр пӗлтерӗшлӗ акцент. 9 класра вӗренекен 600-е яхӑн ача авӑн уйӑхӗнче экзаменсене тепӗр хут тытма пултарӗ. Ҫакӑн пек ачасем валли Чӑваш Енре республика Пуҫлӑхӗ хушнипе «ПроСтарт» проект пурнӑҫланать. Регион Пуҫлӑхӗ муниципалитетсен ертӳҫисене ҫакнашкал ҫул ҫитмен кашни ҫамрӑкпа специалистсене, ҫав шутра психологсене те, явӑҫтарса персоналлӑ ӗҫ йӗркелеме хушнӑ. Вӗсене адаптациленме, экзаменсем пама тата тулли пӗлӳ процесӗ патне таврӑнма пулӑшӗҫ.