Ҫул-йӗре тирпейлес тата ҫӗнетсе улӑштарас тапхӑр Чӑваш Енре вӗҫленсе пырать. Объектсен пӗтӗмӗшле хатӗрлӗхӗ 90 процентран иртет. Транспорт инфратытӑмӗн хӑвӑртлӑхӗпе кӑтартӑвӗсене кӑҫал 9 уйӑх хушшинче епле пурнӑҫланине Правительство ҫуртӗнче эрнесерен ирттерекен канашлура тӗплӗн пӑхса тухнӑ.

«Регионти трассӑсене тата тӗрев сечӗсене пӑхас пулсан, ҫитӗнӳсем ҫук мар. Кӑтартусем лайӑх. Мӗнпур палӑртса хунӑ ӗҫсене графикпа килӗшӳллӗн пурнӑҫланӑ. Тепӗр пысӑк ӗҫ – вырӑнти пӗлтерӗшлӗ ҫулсем, вӗсем республикӑра вунӑ пин ытла ҫухрӑм йышӑнаҫҫӗ. Халӑх ҫулсем пирки тӑтӑшах ыйтусем ҫӗклени те пӗлтерӗшлӗ. Кашни муниципалитетри лару-тӑрӑва тарӑн пӑхса тухмалла. Пирӗн тӗллев – ҫынсене пурӑнма кирлӗ пек хӑтлӑ условисем йӗркелесе парасси», – тесе палӑртса каланӑ хӑйӗн сӑмахӗнче Чӑваш Ен Пуҫлӑхӗ Олег Николаев.

Чӑваш Енӗн транспорт тата ҫул-йӗр хуҫалӑхӗн министрӗ Максим Петров пӗлтернӗ тӑрӑх, Ҫул-йӗр фончӗн пӗтӗмӗшле калӑпӑшӗ кӑҫал 11,8 млрд тенкӗпе танлашнӑ, ку вӑл пӗлтӗрхинчен 2,8 млрд ытларах. Вӗсенчен 2,9 млрд тенкине федераци центрӗ уйӑрнӑ, 8,9 млрдне республика Правительстви регион бюджетӗнчен тӑкакланӑ.
«Кӑҫал эпир пахалӑхлӑ ӗҫ туса ирттертӗмӗр. Сезон вӗҫлениччен 600 ҫухрӑм ҫула ҫӗнететпӗр, ҫав шутра хӑвӑртлӑхлӑ трассӑпа усӑ курнӑ лаптӑксене те. Ҫак объектсем ҫынсене чылай вӑхӑт чӑрмав кӳнӗ, паян та эпир вӗсене юсаса ҫӗнетес енӗпе ӗҫлетпӗр», – палӑртрӗ Чӑваш Ен Транспорт министерствин ертӳҫи.

Регионти ҫул-йӗрсем «Пурӑнма кирлӗ инфратытӑм» нацпроектпа тата «Хӑрушлӑхсӑр ҫулсем» Пӗрлӗхлӗ Раҫҫей парти проекчӗ пулӑшнипе ҫӗнелсе пыраҫҫӗ. Ҫак тӗллевсем валли 6,2 млрд тенкӗ янӑ. Шупашкар агломерацийӗнче регионти ҫул-йӗрсене 152 ҫухрӑм тӑршшӗ асфальт сарнӑ, аслӑ ҫулсем хӗрринчи урам ҫутин ҫӗнӗ линийӗсене 23 ҫухрӑм тунӑ. Ҫул-йӗр сезонне вӗҫленӗ ҫӗре строительсем пурӗ 330 ҫухрӑм ҫула асфальтобетонпа тата 270 ҫухрӑм тӑпраллӑ ҫулсемпе ҫыхӑнтарӗҫ. 10 ҫухрӑмх ҫӗнӗ автоҫулсем хываҫҫӗ. Унсӑр пуҫне 6 кӗпере тӗпрен ҫӗнетеҫҫӗ.

Ӗҫсем пысӑк магистральсенче кӑна мар, муниципалитетсенче хастар пулса пыраҫҫӗ. Вырӑнти ҫулсене ҫӗнетме регион бюджетӗнчен 1,2 млрд тенкӗ ытла уйӑрнӑ. Подрядчиксем те пурӑнмалли ҫуртсем патӗнчи территорисене йӗркене кӗртеҫҫӗ. Ҫулталӑк вӗҫлениччен 54 картише тата вӗсем патне пымалли ҫула юсаса пӗтерӗҫ.