Чӳк уйӑхӗн 12-мӗшӗнче Мускавра Чӑваш Республикин Пуҫлӑхӗ Олег Николаев Раҫҫей Федерацийӗн Правительствин Председателӗн ҫумӗпе - финанс Министрӗпе Антон Силуановпа тӗл пулнӑ.  Икӗ ен Чӑваш Республикин социаллӑ пурнӑҫпа экономика аталанӑвӗн пӗтӗмлетӗвӗсене, бюджет шайлашулӑхне тивӗҫтерессипе ҫыхӑннӑ ыйтусене  сӳтсе явнӑ.

Чӑваш Ен экономики ӳсӗм кӑтартать: пӗрлештернӗ бюджет тупӑшӗ 9 уйӑхра 134 миллиард тенкӗ ытла пулнӑ. Бюджет политикин тӗп приоритечӗ - ҫынсем умӗнчи социаллӑ обязательствӑсене пурнӑҫласси.

2026 ҫулта Чӑваш Ене федераци бюджетӗнчен 20 миллиард тенкӗ ытла тӗллевлӗ бюджет хушшинчи трансфертсем тата 18,5 миллиард тенкӗ регионсен бюджет тивӗҫтерӗвне шайлашуллӑ тума паракан дотацисем пӑхса хӑварнӑ. Ҫавӑн пекех 2030 ҫулччен республикӑна 3,5 миллиард тенкӗлӗх казначейство инфратытӑм кредичӗсен лимичӗсене  ҫирӗплетнӗ. Укҫа-тенке ЖКХ тытӑмӗнчи тата инфратытӑм аталанӑвӗнчи проектсене пурнӑҫа кӗртме тӑкаклама палӑртнӑ.

Чӑваш Ен Пуҫлӑхӗ федераци енчен тӗрев куҫнине пула республикӑра пысӑк объектсем пурнӑҫланнине пӗлтернӗ: Шупашкар хулинчи «Акварель» тата «Ҫӗнӗ хула» микрорайонсенче 825 тата 1400 вырӑнлӑх шкулсем, Вӑрмарти тӗп район больницин поликлиники, 9-мӗш №-лӗ спорт шкулӗ ҫумӗнче ишев спорткомплексӗ, Шоршелти А.Г. Николаев ячӗллӗ музей реконструкцийӗ. Ҫитес ҫулта - РКБ ҫӗнӗ инфекци корпусне тума пуҫласси ыйту та кун йӗркинчех тӑрать.

Ҫӗршыв Президенчӗ Владимир Путин тата Раҫҫей Федерацийӗн Правительстви пулӑшнипе республикӑра Чӑваш Республикин социаллӑ-экономика аталанӑвӗн уйрӑм программипе килӗшӳллӗн мероприятисем пурнӑҫланаҫҫӗ.

Федераци центрӗн пулӑшӑвӗ парӑм чакарма витӗм кӳни пысӑк пӗлтерӗшлӗ. 2025–2026 ҫулсенче уйрӑм бюджет кредичӗсем тӑрӑх парӑмӑн икӗ виҫҫӗмӗш пайне 5,7 миллиард тенкӗ саплаштарнӑ. Укҫа-тенке ятарлӑ ҫар операцине хутшӑнакансене тата вӗсен ҫемйисене пулӑшма  тӑкакланӑ. Ҫавӑн пекех 2,1 миллиард тенкӗлӗх бюджет кредичӗсем тӑрӑх парӑмсене татмалли тапхӑра 2026–2029 ҫулсенчен 2030–2033 ҫулсене куҫарнӑ.

«Пысӑк ҫитӗнӳсемпе палӑрма, пысӑк объектсене регионӑн укҫи-тенкипе ҫеҫ туса лартни ҫителӗксӗртерех. Федераци центрӗ тӗрев пани  паха, вӗсемсӗр паллах, май та ҫук мӗнпур ӗҫсене пурнӑҫлама. Эпӗ чун-чӗререн Раҫҫей Минфинне тата Антон Германовича пирӗн командӑна  тӗрев панӑшӑн тав тӑватӑп. Малашне те республикӑра пурӑнакансен ырлӑхне лайӑхлатас тӗллевпе Раҫҫей Минфинӗпе тата Правительствипе конструктивлӑ та килӗшсе ӗҫлесе пыма тӑрӑшӑпӑр», - палӑртнӑ Олег Николаев.